大家細個時睇電視，相信都有見過啲不良商人將啲藥材價錢由「斤」變「兩」，又或「兩」變「錢」以欺騙遊客。而近日日本電視就報導，有一個專賣西洋書法用品嘅網站，亦用上類似嘅手法黎欺騙日本顧客，而佢哋出古惑嘅地方，就在於貨幣單位「￥」之上。

日本國民生活中心 (類似香港嘅消委會) 於上週發出公告，表示近期接連收到針對西洋書法用品網站「Calli-Calli.com」嘅投訴。據報部份客人係先於社交網站上見到相關產品嘅廣告，然後被導向「Calli-Calli.com」嘅網店。網店出售嘅係教人寫西洋書法嘅電子版「Copybook」，而且於日本地區瀏覽嘅話，整個網頁都會係日文。所以當顧客見到一本「Copybook」最平賣緊「￥700」時，就會好理想當然地覺得係賣「700日圓」。但當顧客畀錢時，就會發現個結算單位，其實係「人民幣」，換言之個實際價格係「700日圓」嘅近20倍。

雖然「人民幣」嘅單位符號的確都係「￥」，但賣家於一個寫滿日文嘅網站，用上一個日本人熟悉嘅貨幣符號黎代表人民幣，就非常有刻意誤導日本客人嘅嫌疑。據日本國民生活中心表示，目前接到近100宗類似投訴，而當佢哋試圖聯絡「Calli-Calli.com」時，對方就冇任何回覆，整個網頁上亦冇營運公司嘅聯絡方法。所以特意提醒民眾要小心類似嘅手法。

資料來源：Kokusen.go.jp