卻說網上素來都有個「孤獨等級表」，如果你自己去食飯就係Level幾、自己去旅行又係Level幾咁，好似「自己一個」係啲咩唔應該做嘅事咁。但近日一名心理學家就於網上撰文，表示「自己一個」嘅時間，可能對於心理健康有所幫助，所以大家係唔使怕「一人之境」嘅！

圖片：《國際孤獨等級》MV截圖

來自英國Durham大學嘅心理學系助理教授「Thuy-vy Nguyen」近日於《The Conversation》上撰文，表示「獨處 (Solitude)」同「寂寞 (Loneliness)」係兩回事黎，而且「獨處」亦唔代表「身邊冇其他人」，即使身處人來人往嘅Cafe，你都可以獲得獨處嘅時間。

佢引述自己早前進行嘅研究，指如果將一班大學生放入一間房到靜靜地坐，只需要坐短短15分鐘，學生們嘅焦慮或興奮等強烈情緒都會開始消退。換言之當面對沮喪、煩躁、憤怒等情緒時，獨處能夠幫助你平復心情。

同時佢亦指出獨處唔係內向人嘅專利。佢引用《BBC》於2016年報導過嘅一份研究，指出全球18,000名受訪者中，有超過一半都表示獨處係佢哋「休息」時嘅重要活動之一。所以即使外向人其實都可能需要獨處嘅時間。

圖片：《一人之境》MV截圖

不過佢亦提到，獨處嘅最大「敵人」其實係「悶」。回到佢自己進行嘅研究，佢發現比起「齋坐」，大學生們更傾向「有啲嘢做」，哪怕只係「排好啲鉛筆」呢啲無意義又無聊嘅活動，都比齋坐更好。而回到現實之中，獨處嘅活動可以係睇書、做家務、去超級市場買嘢，甚至只係碌下電話等等，所以即使想享有獨處時間，都唔需要逼自己咩都唔做。

同時佢亦親身試過自己一個去旅行、去睇戲等大家普遍覺得應該要「同Friend做」嘅活動，並表示從中得到平靜，以及享受自己想做咩就做咩嘅自由。佢表示要打破呢個固有觀念，大家應該將獨處視為一個正面選擇，而唔係被逼嘅。

資料來源：The Conversation