提到護膚問題，男士肯定有種種疑問，始終男士嘅護膚經驗無女士們深厚，想要皮光肉滑嘅肌膚仍須要多多學習，簡單至敷面膜，其實並非「撻」塊面膜上面即可，想要極大化面膜所帶嚟嘅護膚功效，麻煩有以下4大要點留意番︰

1.敷面時間維持15-20分鐘

知道有唔少男士，習慣臨瞓前先敷面膜，跟住就一覺瞓到大天光，諗住瞓醒之後先撕走面膜，以為咁樣就全晚都為皮膚注入養份，其實剛好相反，因為皮膚對於營養吸收有一定限度，而且，基於面膜構造原理，乾咗嘅面膜，反而會吸收番皮膚入面嘅水份，最後，只會敷咗等於無敷。

2.沖涼時不宜敷面膜

又係貪方便，諗住沖涼再敷埋面膜一了百了，咁就快靚正！但其實唔建議大家沖涼時敷面膜，因為水汽會導致面膜與皮膚難以緊密接觸，而且企係到沖涼時，面膜也不能緊貼皮膚，在傳送養份方面，未能達到最佳效果。

3.眼膜與面膜是兩回事

有時買番嚟嘅面膜太大，大家就諗住將多出嚟嘅部份，略為收剪一下，多咗出嚟唔駛浪費，就不如用嚟敷埋眼部位置，咁樣做就錯嘞，因為眼部四周肌膚特別脆弱，厚度只有正常肌膚嘅四分之一，所以，所以要用個別產品，如眼膜，以減低過敏風險。

4.敷面次數不宜過份進取

夏天時份，男士面部特別易出油，其中原因，就喺源於底層缺水，於是，男士們就諗住勤力敷多幾塊面膜補水就無事，一星期敷足7日，就肯定水份包滿。事實並非如此，基本上，一星期敷1至2次已經足夠，若多過3次，好可能會傷害角質層，減低臉部防護能力。