終於唔係聽到M記又靜靜地加價嘅消息，而係餐廳決定要將室內設計嚟一轉大翻新，由亞洲區開始，包括亞太、中東及非洲區分店等等都要打造新形象，認真到連行動代號都有埋，叫「McMakeover」。

今次翻新行動，應該同餐廳飲食方向改革有密切關係，皆因M記經常遭人批評其所售賣嘅食物唔健康，與junk food無異，若果再唔改變策略，跟大隊走健康飲食路線，遲早分店愈執愈多，有數據顯示，M記單就2015上半年，全球已經關閉了350間分店（全球共有32,500間分店），若不加快改革進度，生意額度再難有增長。

管理層當然意識到問題重要性，翻新計劃刻不容緩，亦已經靜悄悄地由亞洲區開始，佈局將以現時極受追捧嘅北歐風牽頭，走簡約風格路線，做到三大原則――乾淨、簡單、自然！用料方面，70年代被視為乾淨衛生象徵嘅模壓塑料座椅及玻璃纖維餐桌將會換走，以天然木料製作、具家居感的設計取代。