劍橋字典近日公佈 2025 年度代表字為「parasocial」（擬社交互動），亦即一個人對「我唔真係識佢、對方亦唔識我」嘅對象產生情感連結，甚至可以包括同聊天機械人一類人工智能之間的「感情」。揭示現代人似乎進入一種只需要「我情我願」嘅社交關係。

圖片：@taylorswift

「Parasocial」一字並非新發明，最早可以追溯到社會學家 Donald Horton 與 Richard Wohl 於 1956 年提出，形容電視觀眾與電視人物之間嘅「單向關係」。劍橋字典指出，今時今日呢種關係已經由電視轉移到社交平台：用戶會對現實中完全無私交甚至無接觸嘅名人、明星、KOL、網紅產生投入感。例如大量 Fans 因為歌手Taylor Swift 與 NFL 球星 Travis Kelce 宣佈訂婚而感到非常投入；又或Lily Allen 新專輯《West End Girl》再次引發大家對佢私生活嘅「寄情式關注」等，都係典型「parasocial」現象。

圖片：ImageFX

而除咗「Fans文化」，AI嘅興起亦助長「Parasocial」關係出現。劍橋字典指出隨住愈來愈多人開始長時間與 ChatGPT 等對話式 AI 互動，令人開始擔心會出現「對機械人產生情感依賴」。劍橋大學的實驗社會心理學教授 Simone Schnall亦指出，現代社會愈來愈多人與網紅建立強烈情感關係，自覺好了解對方、可以信任對方、甚至極度忠誠，但實際上整個關係都係單方面投射。呢股風潮不僅重新定義Fans文化、名人概念，甚至連一般人嘅線上互動方式都會被改寫。

資料來源：CNN