土耳其安卡拉大學最近一項研究發現，貓貓對男主人同女主人嘅「喵喵待遇」其實唔一樣，簡單黎講就係貓貓向男主人「喵喵」叫嘅次數，比起對女主人時高出一倍。咁你可能會話：係咪貓貓鍾意同男人傾計多啲呀？咁你就完全表錯情啦！事關研究提出嘅解釋係：因為你班男人遲鈍，所以隻貓咪要叫多幾聲囉！

圖片：Pixabay

話說研究團隊早前做咗小型實驗，要求31 隻嘅貓主人戴住胸前小型鏡頭返屋企入門口，以紀錄貓貓於「奴才」回家之後嘅行為。結果發現於「奴才」入門口頭 100 秒內，貓貓對男性主人平均會叫 4.3 下，但對女性主人就只有 1.8 聲。

研究團隊指出貓貓叫聲次數嘅差異，係在於男女主人嘅行為不同。女主人更常用貓鍾意嘅「BB 聲」，甚至無意義嘅歌仔去同貓溝通，亦對貓貓發出嘅細微訊號較敏感；相反男性相較之下就顯得遲鈍，需要隻貓發出明確訊號——即係「喵喵」叫——先會作出反應。久而久之，隻貓自然就學識要叫多啲先有人理佢。

圖片：Pixabay

此外同一個研究亦整理出貓貓迎接主人回家嘅一套儀式，當中包括豎直尾巴、主動行前貼近，以及主動用頭去磨主人身體、留底自己氣味嘅「愛撫式頂頭」。研究亦指出貓貓呢啲行為並非因為肚餓問你攞嘢食，而係真心因為主人返屋企而感到開心同安心。

資料來源：yorozoonews.jp