撇除環境或家人唔許何等因素之外，唔少人唔養寵物嘅原因就係驚要使好多錢。不過據英國嘅一個最新研究，養寵物提供嘅人生滿足度，其實係同每年賺多7萬英鎊（約HKD$75萬）一樣。換言之養寵物「賺」到嘅錢分分鐘比你份糧仲多！咁你話仲有咩理由唔養呢？

圖片：Pixabay

其實過去早有研究指出養寵物能夠提升人生滿足度，但由於過去研究都未能準確指出兩者之間係「有關聯」定係「有因果關係」，同時亦未能指出關係或因果方向——究竟係「養寵物先開心」，定係「開心先去養寵物」——所以來自倫敦經經濟大學及Kent大學嘅兩位學者，就利用英國家庭縱向研究嘅數據，從中選出「被有養寵物但去咗旅行嘅鄰居請去幫手睇屋及照顧寵物」呢個情景，將「寵物陪伴」嘅好處獨立出黎，再控制收入、年齡、健康、鄰里關係等會影響人生滿足度嘅變數，從而得出「寵物陪伴」對人生滿足度嘅影響。

圖片：Pixabay

結果就發現，有咗「寵物陪伴」之後，受訪者嘅人生滿足度於7分滿分標準中，可以大幅增加3到4分。而如果要靠增加年收入黎達到同樣升幅，咁就要每年多賺7萬英鎊。換言之養寵物帶來嘅快樂，就等如每年賺多75萬港紙！如果你唔鍾意下下都講錢，養寵物帶來嘅人生滿足度，亦同「結婚」或者「經常與家人朋友會面」相約。所以話寵物真係稱得「人生伴侶」㗎！

同一個研究亦發現有養寵物嘅人，於「五大人格特質」（Big 5）中平均會比較開放、盡責及外向。如果按寵物種黎區分的話，「貓奴」們會傾向更開放，容易接納新事物；而「狗奴」們則會更外向及隨和，同時亦比較唔「神經質」。

資料來源：The Value of Pets: The Quantifiable Impact of Pets on Life Satisfaction