單身嘅你，諗住辛辛苦苦捱過聖誕就唔使比人閃？傻豬黎嘅，仲有農曆新年、元宵、情人節同白色情人節一路～排到三月呀！你避？你避得去邊！作為一個男人，就應該正面面對呢啲問題──正正經經搵返個女朋友閃返人哋！但追女呢家嘢，唔係話讚人有仙氣就搞得掂嘅！而係由內到外再到返內嘅一個過程！就等擁有多年經驗嘅文青(失敗經驗唔係經驗呀家陣？)同你分享下究竟應該由咩地方著手！

圖片：motivatequotes.com

心態

所謂態度決定高度，你嘅心態，就係決定你能唔能夠成功識到女仔嘅最主要因素！而與其講啲好老土嘅「最緊要有自信」，文青就話你最緊要有夠「恨」意！呢個恨字有兩個解釋：第一，你真係要有三分憎恨，例如憎恨自己剩係夠膽望而冇行動，又或者憎恨每一次都眼白白睇住心儀嘅女仔投入人家懷抱。正正因為「恨」所以先要改變。呢個係你嘅動力來源，會推動你突破自己。第二，就係你真係「好恨要」嗰個女仔。冇錯，係「嗰個」，而唔係「嗰堆」。如果你見到任何有兩分姿色，但自己其實唔係好鍾意嘅女仔都照去馬，你只會淪為一隻長期發情嘅狗公。但如果你「恨要」一個心儀對象，你就會清淅地向住「令自己變好，先會得到呢條女」嘅目標前進，除咗比較目標為本，成件事個公關形象都好好多──你知啦，今時今日做人冇公關，食屎架嘛！

談吐

男神黃子華喺《跟住去邊度》入面曾經提出過「溝嗒咀揸扑」五個追女步驟。「咀揸扑」呢啲，大家由細到大都睇唔少紀錄片，相信都難你哋唔到。但「溝嗒」呢家嘢就未必個個駕馭得黎！「溝」者，溝通也。人與人之間嘅溝通，大多數係由對話開始。無論說話內容、語氣、動作，都會影響對方對你嘅印象，稍有差池就會被烙上一個不能磨滅嘅「非食用」烙印，更加遑論去到「嗒糖」嘅階段。好多人自以為充滿幽默感，只要講嘢夠好笑條女就會為之傾倒。但實際上被當成諧星嘅機率其實更高。關鍵之處就在於你究竟係「表演幽默」，定係能夠將幽默融入「Small Talks」之中。

所謂「Small Talks」，即係「吹水」，準確嘅定義上係「沒任何目的與功用的對話」，講白啲就即係廢話，「上個星期去邊」、「今天天氣幾好」、「聖誕收咗咩禮物呀」呢啲通通都算。但廢話唔一定真廢，「Small Talks」嘅偉大之處在於佢夠輕鬆易入口。尤其當你初初認識新朋友，如果一開口就同佢講全民退保、高鐵撥款，就算佢唔係政治冷感起碼都會打個突。但Small Talks無傷大雅，簡單易明，呢個時候再加上幽默感，就能容易帶動氣氛。Small Talks嘅另一個好處，就係令你更了解呢個人。例如佢答你「上個星期去咗行山」，你除咗知道佢可能係個著重健康嘅人，仲可以打蛇隨棍上問下佢同咩人去、平時行開邊，「喂我平時都有行喎，搵日不如一齊呀？」成件事幾自然！

圖片：Street Smith

外型

係，「Your face」，係真係「Your fate」嘅！畢竟男人們都希望搵個樣靚身材正嘅女人，咁女人們有同樣嘅諗法都係天經地義呀？而且外型比起上面講嘅談吐，其實更能左右其他人對你嘅第一印象(佢都要睇到你先會同到你講嘢架嘛)。所以係識女仔呢方面，外型的確係重要嘅。好多人又會話靚仔高大著咩都靚啦！啱，但呢個係人哋嘅特權，而唔係你唔打扮嘅藉口！而且如果你先天條件不足，後天栽培就更加重要啦下話？

要執靚個外型，其實真係唔難。你唔使花咩大錢──你睇內地同胞們著哂名牌上身，你咪又係一眼就睇得出佢黎自湖南洞庭湖草頭鄉上陽村？你亦唔需要花好多心思時間，U記其實都好夠──不過記住唔好信佢啲海報同公仔嘅襯法，嗰啲真係睇就靚，著上身真係毒L咁款。重點其實只有兩個。第一，要合身；第二，要簡潔。任何識閃嘅嘢都唔好放上身，咩飾品珠片尖頭皮鞋條條揈呢樣嗰樣通通同我掉哂佢！只要著重色塊嘅配搭就夠啦！例如上身係灰色衫，下身就可以襯返條海軍藍褲，再加對白色波鞋；又或者你白恤衫配卡其色軍褸，就唔好再著卡其色嘅褲。跟住呢個思路去走，你至少可以避免成為灰衫灰褲灰鞋嘅人囉！咁樣一啲都唔詼諧囉！

髮型

點解髮型要另外拆出黎講？因為佢真係好重要！你需知道形象呢家嘢係一個整體概念，由頭到腳都必須要配合好先有最佳效果。但好多男人唔知係懶定咩，硬係鍾意做一半唔做一半，買咗件靚衫就襯爛鞋；執好咗個身就配7頭。其實髮型都好重要，我唔要求你要梳比比鳥頭、亦唔需要你每朝起身用兩個鐘逐執逐執咁擰返出黎，我對你嘅唯一要求就係梳得佢整整齊齊，唔好好似將堆格肋底毛放咗上頭咁啫，其實都唔難呀？定期剪下髮啫？

另外就係顏色啦！唔知係咪壓力太大，好多男人好後生就開始有白頭髮，嚴重起上黎真係白髮魔男咁款。但容許我提提你呢個世上只有兩個男人襯白頭髮：一個係「銀狐」拉雲拿利，一個係楊過，你係邊個？兩個都唔係？咁就麻煩你染返黑個頭啦！染髮其實真係好簡單，就算你真係楊過得返隻左手都一樣搞得掂！就好似Just For Men出嘅染髮劑咁，顏色自然，不傷頭髮，而且持久有效。最重要係拎出黎，擰支染髮梳上去就可以直接梳上頭，真係唔戴(手)套都冇問題！你話你仲有咩藉口，你話！

睇到呢到，你明白個重點啦嘛──冇錯！就係Just For Men嘅染髮劑真係好有用、好好用、好值得用！有白頭髮問題嘅你真係要馬上、即刻、立即、依家就去買黎用！你話我賣廣告？係架啦！之但係你都睇到黎最後呢句啦，你都唔會依家先黎怪我啦下話？