屬於香港人嘅荔園上年強勢回歸，聲勢浩大，不過評價就毀譽參半，有人覺得見到隻恐龍啲回憶已經返晒嚟，有人就覺得樂園感覺太商業化，失去昔日最重要嘅Local味。但係荔園就堅持唔放棄，上年你唔Buy？Fine！今年再接再厲，延續荔園精神，除咗保留經典遊戲同活動之外，仲新增多個遊樂項目，其中有兩個「全港首個乜乜乜」設施，聽落都幾把炮。

今年「荔園Super Summer 2016」以「夏日大晒」作主題，設有室內同室外娛樂設備，主場館選擇於亞洲國際博覽館嘅8號及10號展館舉行，咁大家就唔怕風吹雨打～另外室外設備就定於亞洲國際博覽館戶外嘅貨車調度區。成個室內佔地11,000平方米，戶外佔地8,000平方米，總面積共19,000平方米。

「荔園Super Summer 2016」同樣有大象TINO、擲階磚、碰碰車、大舞台等等，另外加設7個主要景點，當中5個都係老少咸宜，啱晒一家大細，喺MenClub就唔多提喇～但如果講到巴打們可能感興趣嘅遊樂設施，我諗以下呢兩個都值得介紹下嘅～

充氣大暴走
全港首個室內最長充氣競技遊戲，有成110米長，有排你彈呀，不過玩法係點，暫時未清楚……

XRace
全港首個電動高卡車車場，車場佔地約8,000平方米，賽道全長為650米（保護欄長度為1,400米），時速最快為每小時50公里，可以一嘗做車手嘅快感！今次荔園引入德國RiMO全新電動高卡車，係市面上最高端、最高性能同最高安全性嘅電動高卡車。而賽道就由米高舒密加嘅賽道設計師Michael Kolbinger設計，由來自德國嘅專業電動高卡車團隊營運，配合香港專業高卡車場顧問團隊，以確保活動的安全。另外大會仲會為所有參加者紀錄圈速，成個活動中最快嘅一位，可以獲得首屆國際汽聯電動方程式錦標賽第三賽季分站賽 - 香港電動大獎賽Grand Stand 門票兩張！不過呢個項目唔包括喺入場套票內，要網上預約購票，費用係每位港幣$280，記得留意喇！

「荔園Super Summer 2016」

日期︰7月15日至8月7日
地址︰亞洲國際博覽館戶外的貨車調度區以及室內的8號及10號展館
開放時間︰星期一至四—早上11時至晚上8時；星期五至日—早上10時至晚上8時
入場套票︰星期一至四—港幣$140（10 個代幣）；星期五至日（早上10時至中午12時）—港幣$140（10個代幣）/星期五至日（中午12時至下午8時）港幣$180（12個代幣）*65歲或以上入場人士半價優惠；3歲或以下入場人士免費（不包括任何代幣）