點解女人咁驚30歲？

「因為代表你要去另一個階段，要做一個有承擔嘅人、有擔當嘅『女人』，而唔再係個『細路仔』、『女仔』。同埋好驚冇人錫，可能男仔會覺得︰你咁大個人，你唔係『女仔』喇，你唔係少少嘢都想我幫你呀？錫你呀？遷就你呀？可能好多時因為咁，令我哋（女人）自己都會諗︰我哋成熟喇、大個喇，好多嘢做錯，大家都唔會再容忍你原諒你，覺得︰『佢都係個細路仔啫～佢都只不過係廿幾歲啫～』所以我哋唔可以再任性。」——周秀娜

「因為佢係一個關口，佢係話畀你聽你嘅青春已經完喇，所以你要為以後作出嘅每一個決定、每一個舉動諗埋後果，同埋要鋪排你嘅將來鋪排得更好更仔細。」——鄭欣宜

「因為係一個階段。當你畢業之後，做嘢做咗一段時間，可能拍拖又拍咗好幾年，有啲財富，有啲知識，有啲經驗，咁人愈擁有得多，就愈驚失去，開始會好驚失去所有嘢，會變得冇安全感。所以特別係２字頭轉３字頭，對女人而言好似好大件事好大關口咁，因為好多女士會好驚自己之後咩都冇晒。」——彭秀慧

《29+1》經已上映一段時間，Mean娜身邊唔少女性朋友都有入場觀看電影，問到男性朋友呢？大部分對《29+1》興趣不大，紛紛表示︰「講女人30歲嘅戲關我咩事？」你啱，講女人嘢，女人自然會想睇；但除非巴打你係完全女性絕緣體，如果唔係只要身邊有老婆、有女朋友、有女性朋友、有女同事、有女上司乜乜乜呢類雌性生物圍繞住你，《29+1》呢套深入探究女性心理嘅電影，都好關你事。

老老竇竇，其實30不過係一個數字，做咩女人好似特別忌違，係都要29+1、29+1咁去叫30歲？不如先同大家上一堂AV以外嘅生物課，根據非正式統計，好多女性都發覺25歲打後，新陳代謝明顯減慢，頭髮長得慢咗、暗瘡印淡得慢咗，最灰係減肥都減得慢咗。然後由25歲開始，會發覺皮膚狀態不如以前，嘴邊肉鬆弛、法令紋加深、色斑增加……偶爾通一、兩晚頂，第二日連妝都上唔到，整日行屍走肉咁款，再望望街上十幾廿歲皮光肉滑嘅青春少艾，就會驚覺︰我老了。而呢種感覺，唔係出於個人神經質嘅敏感，而係女人s嘅共識。《29+1》導演彭秀慧30歲時，發覺身邊好友都為即將30歲而感到不安，於是就決定寫寫呢個女性都感興趣嘅題材︰「踏入30歲，女人會突然望多咗好多嘢，突然關注自身狀態，突然關注身邊嘅人；或者突然覺得身邊嘅人成日望住自己，總之突然間會有種不安嘅心情。雖然唔係全部，但有若干女生係到30歲，突然會注意自己個樣得唔得？比唔比得上人哋？怕人哋覺得佢唔夠一個Standard，開始出現好多比較。」欣宜都笑言︰「就好似未有皺紋就搽定Anti-Aging、Anti-wrinkle啲Creams先。」彭秀慧續說︰「事實上係會嘅，的而且確你都做嘢捱咗一段時間，就會覺得係時候要保養自己，跟住會因為想好好保養自己，而變得過分擔心。」

其實唔難明白女人點解有呢種心態，當自己離青春愈來愈遠，但男人依然從一而終地J緊18、22嘅妹妹時，女人自自然然會明白，唔似得「男人愈老愈有魅力」呢套，世上90%男人都係視覺動物，女人堅要靠樣，唔Keep唔得；再加上社會不停灌輸︰女人30就係「中女」、女人年紀愈大愈冇市場價值等等Concept，就算自己本身唔Care，畀人講得多提得多，對於30呢個數字多少都有啲淆底。嗱嗱嗱，唔係普通女人先會咁，就連女神周秀娜都一樣淆淆地︰「可能因為身邊朋友圍埋一齊食飯，大家講嘅話題多咗美容、SkinCare，又真係會檢查皮膚狀況……咁呢啲係表面上嘅，咁心態上30歲前同30歲後，我諗係會有少少唔同，嗰個唔同唔係突然之間，而係可能28、9歲開始，逐啲逐啲自己經歷過、感受過好多嘢，再到 30歲時，你會對自己將來嘅選擇、想要咩嘢，都會更加清晰。」

正如男人到某個年紀會腦內「叮」一聲，唔再掛住由朝到晚打機嬉笑玩鬧，會突然認真諗事業諗前途，好似周秀娜所講，女人到２字尾開始，人生歷練多咗，到30歲新關口，除咗諗多咗皮膚，仲會諗多咗自身。喺開首嘅文字中，彭秀慧都提過︰「人愈擁有得多，就愈驚失去……」點解驚失去？如果凡事你都掌控到，其實冇咩好擔心，欣宜就認為，隨住年紀愈大，女人真正最擔心就係「不能夠控制嘅東西」，因為控制唔到，你唔知事情將來會點，然後害怕失去。彭秀慧就話︰「當你經歷到一啲真係控制唔到嘅嘢，包括疾病、衰老、離開，甚至感情，呢啲唔係單手或者雙手控制得到，然後你愈用力就會愈痛苦，所以我哋要不停去面對同學習，同時學識唔好過分地擔心。」所以到30歲，女人會思考得更多，會諗自己想成為點嘅人，想擁有點嘅未來，而女人嘅未來，大多數都有一個「他」嘅存在。

愛情方面，有咩係以前唔會諗，到差唔多30歲時開始會諗呢？「經濟方面嘅距離。」欣宜認為︰「雖然我自己畀自己都絕對冇問題，但我接受唔到要養一個人。因為呢啲錢係我自己辛苦賺返嚟，我唔需要養你，如果我想買禮物畀你係另一回事。同埋我覺得男仔同女仔之間，男仔都要有男仔嘅尊嚴，我都唔希望如果我要去旅行，佢又會唔會唔舒服呢？佢一唔一齊嚟到呢？又或者我今日想食貴啲嘅一餐，又要諗埋佢o唔ok呢？我會覺得好辛苦。」呢一點，周秀娜都認同︰「唔係要搵一個好有經濟能力嘅人，都唔係要搵一個超級富豪……以前會諗唔明，覺得有冇錢都唔緊要，但當你自己大個咗，自己經濟獨立嘅時候，就會發覺一個問題就係，我都想搵一個同我生活差唔多嘅人，我哋可以一齊去做唔同嘢，而唔需要擔心太多。因為男性係好有自尊，所以當大家唔可以平等嘅時候，就會好多嘢參與唔到、溝通唔到，呢個係我自己而家會睇得到嘅嘢。」

可能唔少男讀者覺得對男士有經濟要求呢點已經叫做好「港女」，但認真睇返前文後理，欣宜同周秀娜嘅主張係企喺經濟獨立嘅女性而言︰用自己嘅錢同男友去旅行；用自己嘅錢同男友食大餐，可以自己畀自己，只係唔想助養軟飯王，帶出嘅重點其實係，女人人大咗，對愛情嘅睇法都現實咗，唔再只有天馬行空嘅浪漫，因為經歷多咗，諗嘢更理性，更懂得為自己及彼此關係考慮。雖然呢啲現實諗法無疑對男方會增加壓力，但女性到30歲時身心上嘅壓力，男士又有多少了解呢？如果你身邊都有29+1嘅女性，唔好吝惜你嘅關心，29+1給予女性嘅恐懼，可能遠比你想像中大好多。

Wardrobe: Zara
Stylish：Hazel Leung
Hair：Milk Chan@Xenter（Joyce）、Jo Lam @ Private I Salon（Kearen）、Amber Tse @ Queens Private I（Chrissie）
Makeup：Samuel @江中平化妝室（Joyce）、Angel Mok（Kearen）、Circle Cheung @ndnco.co（Chrissie）