要完成42.195KM嘅全馬賽事可以話一啲都唔簡單，咁部份比全馬長度更長、更多未知數嘅越野跑難度及挑戰性相信更加更加大。而較早前我地香港就有一位越野跑運動員黃浩聰，於全長171.2KM嘅山地超級馬拉松比賽 - 環勃朗峰超級越野耐力賽(UTMB)，賽事海拔總爬升大約9,600 m，而佢就以23小時17分40秒完成，成為排名第10位，亦係全場第1位完成賽事嘅亞洲跑手。值得一提嘅係，呢項賽事係無獎金的….

而今次MenClub同聰Sir做左個專訪，等大家可以了解一下佢參加嘅越野跑賽事以及越野跑同普通長跑有咩大分別。

1. 對於今次參加UTMB賽事有咩感受?

「已經兩年冇參加過比賽，同時無離開過香港，三個月前收到通知喺有限嘅時間下預備呢次比賽。在香港嘅夏天進行訓練，長期炎熱下又只能夠身處低海拔地區跑，頂盡只能夠用大帽山(海拔957米)模擬海外高山作訓練。不過就算有好多條件限制，但我仍能連續兩次登上UTMB頒獎台，證明『只要肯努力，一樣可以!』」

「另外，今次UTMB係我第四場世界越野跑巡迴賽，令我儲夠第四場，聯賽排名升上第三位，係一場持續三年，橫跨整段疫情嘅成果。令我明白堅持着信念不放棄，之前三場比賽嘅努力並沒有白費。」

2. 今次UTMB賽事天氣較凍，有無影響到你?

「在比賽賽道120公里嘅位置，凌晨四時需要攀上賽道最高峰海拔2570米，當時需要面對極寒冷天氣，除體溫流失外，眼睛亦出現「凍盲」情況，令到餘下50公里賽事視力變得模糊。」

「而喺視力受損後，我曾多次跌倒。有一次喺橋上跌倒，手掌落地，導致手部流血，需在醫療站接受包紥。又有一次在入檢查站時，太太不斷呼叫我埋站，但門前有個門框我看不清，因此在太太面前跌倒。其後成功有眼藥水可以滴，並擦擦眼增加眼水，再用清水整濕對眼，視力成功短暫獲得改善。」

3. 越野跑有咩咁吸引你?

「我細個嘅時係一名邊緣青年，大個左都只係一個為生活同工作奔波嘅普通人。但其實我內裡係個好有夢想嘅熱血青年，只係社會上無一種途徑俾我發揮。直到我遇上越野跑，係越野跑改變左我，我揀左越野跑，又或者係越野跑揀左我，透過我去推動呢項運動，從而讓我實踐理想，回饋大自然。」

4. 越野跑對裝備嘅要求係咪比跑街更高? 有咩裝備越野跑一定要帶?

「越野跑比跑街裝備要求更高，因為一上山就無咁容易搵到撤退嘅路，所以要預備自己將要長時間運動，同時需要攜帶保障安全嘅指定裝備，好似保暖毯、哨子、防水外套等等、如果會橫跨晚間嘅亦需要頭燈。」

「當然越野跑路況可以話千變萬化，路面崎嶇不平，一個唔小心就好容易受傷，所以絕對需要一對輕巧而抓地性能良好嘅越野跑鞋。今次自己穿著The North Face VECTIV™ENDURIS鞋款再戰UTMB，因為佢地嘅VECTIV™系統由The North Face專為山地環境中嘅越野跑及行山運動而研發的，佢可以為我地呢啲跑手減少地面衝擊力，同時呈現更高能量嘅輸出。好似喺UTMB持續下降嘅路段都仲可以保持良好嘅足感，亦可以減少我嘅疲勞感，呢一點對於要突破自己嘅我真係好重要」

5. 黎緊自己有咩目標?

「Hong Kong 4 trails Challenge香港四徑挑戰，自己目標48小時內完成，同時希望可以破紀錄。」