出到街，我們往往見到個童顏巨乳超索女仔會拖住其貌不揚的男人、又甚至係一個肥到望唔到腳趾的地中海中年人，這時候你就會非常葡萄：「為何偏偏不是我？」最新研究結果就告訴你點解美女會嫁野獸，一朵鮮花要插牛糞。

美國雜誌《Body Image》刊登了Florida State University與Southern Methodist University共同研究的結果，顯示醜老公有大把市場其實是有根有據。根據報告，如果男人的樣貌欠吸引力，但又娶到個靚老婆，便會覺得自己行運行到腳趾尾，所以返到屋企會變小男人，經常做家務，又會送禮物，人工全上繳，盡能力取悅老婆。同一時間，女人嫁給醜男，因為不怕對方出軌，自信心會增加，壓力也會大減，使婚姻更加長久，心理更加健康。

不過人始終是視覺生物。有另一個研究發現，高大威猛的靚仔或事業線夠深的靚女的確是有著數。3位美國經濟學家收集1991至2005年間，美國兒童照料及青春期發展的數據，再與1958年英國的兒童普查報告對比，發現小朋友，特別是8個月至15歲之間的小朋友，個樣生得得意可愛的話，普遍會比容貌平平的同輩醒目。背後的原因是因為樣靚會獲得大人和老師較多關注，形成先天優勢。

這種先天優勢繼續發展，靚仔靚女的成績就會較好，有較大機會殺入一流大學。宏觀而言，學歷較高，將來收入也會比同輩為佳，雪球效應下對一生人也有正面影響。可是在某些情況下，靚仔靚女是沒著數的，例如財經界早就流行一個定律，愈靚仔靚女的分析員，預測能力愈差愈廢。