疫情令全球遊客量暴跌九成或以上，航空公司首當其衝，與億萬富翁Richard Branson爵士旗下維珍航空嘅澳洲 (Virgin Australia)及大西洋 (Virgin Atlantic)分部相繼向當地政府申請破損保護。

圖片：網上圖片

其中維珍澳洲早於4月向當地政府申請「自願託管」，最後獲美國私募股權企業 Bain Capital注資收購並開始重組。據報會炒全公司三份一員工，即約3000人，同時終止旗下廉航 Tigerair Australia、以及Virgin Australia嘅國際線，目前只以波音737客機飛國內及短途線。

而維珍大西洋就於當地時間星期二向美國法庭申請破產保護。值得一提嘅係維珍大西洋申請嘅係美國破產法第十五章嘅保護令，亦即跨國企業通知美國當局，公司正面臨結業危機，但目前正於國外尋求解決方案。於破產法第十五章之下，公司能夠繼續運營直至情況有變。而維珍大西洋就向英國法庭指，假若未能於月內得出12億英磅解救方案，公司將會於9月結業。

據《Forbes》報導，維珍航空創辦人Richard Branson曾向英國及澳洲政府要求注資解救，但坊間就認為佢家財萬貫，生活奢華仲有個私人小島都要政府出錢救，仲要因為佢登記自己住喺個島 (屬英屬處女島) 而冇向英國交過稅而引起公眾反感。