最近Tesla CEO Elon Musk接受汽車工程師Sandy Munro訪問，老實承認增產期間所製造嘅電動車較容易出問題，建議大家等生產穩定先好買。

Elon Musk表示當公司增加產能，電動車品質就會受到影響，更話2020年底之前個批電動車生產得太快，搞到烤漆有唔同程度嘅問題，直到2020年底先有所改善。被問到應該幾時買Tesla先唔中伏，佢就話如果要買，一係就一推出就買，一係就等生產隱定先買。因為增產個期要整好多部車，好難兼顧產量同汽車所有細節。（食咗誠實豆沙包？）

Tesla Model 3 Performance

Sandy Munro曾喺2018年拆解Tesla Model 3，發現汽車外殼組件唔均勻、烤漆粗糙，當時批評Model 3品質仲差過90年代汽車，諗唔明Tesla點解夠膽拎出嚟賣。事隔三年，Elon Musk喺訪問入面承認當時Sandy Munro批評無錯，更話Model S早期座椅係佢坐過最差嘅汽車座椅，都係後來先慢慢改返好個設計。