通常大家都會用「海上豪宅」嚟形容奢華遊艇，但對於呢艘由荷蘭船廠Oceanco建造嘅「Flying Fox」，相信用上「城堡」嚟形容都唔算誇張。全長446呎船身配備11間套房，各種娛樂設備應有盡有，而且仲可以停泊直昇機，據聞Amazon創辦人Jeff Bezos都訂咗一艘帆船版本。

據外媒Boat International報導，日前荷蘭小鎮Zwijndrecht一間造船廠，突然出現咗艘龐然大物，有傳係Jeff Bezos幾年前向Oceanco所訂製嘅「Flying Fox」帆船版本，代號為Y721。雖然遊艇尚未完工，但可以見到黑色嘅船身上有幾層甲板，預計最後會裝上三支大桅杆，成為全世界最大帆船，亦即係唔開引擎都可以透過風力航行。另外Jeff Bezos同時訂多咗艘較細嘅遊艇當作補給船，其中會備配直昇坪及會議廳，兩艘加埋總共花費近5億美元。

雖然「Flying Fox」帆船版本就未有完成圖可以欣賞，但從原版嘅相都可以見到非常奢華，船身全長446呎共有五層甲板，配備11間套房，而且每間房都有無敵海景露台。另外船上設有健身室、桑拿房、露天泳池、電影院等娛樂設施，可想而知要保養以及營運呢艘遊艇需要花費幾多人力物力，所以大家猜測船主係Jeff Bezos都唔係冇道理嘅。