美國《時代雜誌》（Time）昨日宣布，Tesla及SpaceX創辦人Elon Musk獲選為2021年度風雲人物。同時表示Elon Musk嘅影響力已經超越地球，延伸到太空，無人能敵。

（圖片截自：Matt Rourke/AP、時代雜誌）

《時代雜誌》用幾行句子就概括出Elon Musk多個面向，指出佢係全球首富，但名下冇自己房產，最近一直變賣財產；將衛星送入軌道，並利用太陽能運行；揸緊一部由自己公司生產嘅汽車，無須入油，甚至唔需要司機；只要用手指輕輕一篤，股市就暴漲或暴跌，講每句說話都可以吸引大量Fans關注。

（圖片截自：時代雜誌）

無可否認，今年Elon Musk確實係風頭躉，無論係電動車、加密貨幣、太空探索、人腦晶片、機械人及太陽能領域都可以見到佢嘅身影。其中SpaceX更已經超越波音，掌握住美國宇宙飛行嘅未來，而Tesla就開拓出價值數十億美元嘅電動車市場，並掌握住其中嘅三分之二，公司市值高達一兆美元，令Elon Musk身家水漲船高，登上全球首富寶座。

每年《時代雜誌》都會選出該年度最具影響力嘅事物，獲選對象可以係人物、團體、概念、地方甚至係機器，無論獲選對象造成嘅影響是好是壞，都代表過去一年佢對世界有住深遠影響。當中涉及讀者投票，但最後決定完全由雜誌編輯選出，上年年度風雲人物就由Joe Biden及Kamala Harris共同獲得。