當香港講緊強檢、封區甚至封城嘅同時，地球另一邊嘅美國企業就已經講緊回復正常生活。Microsoft於昨日宣佈，會於本月28日正式重開其處於西雅圖嘅總部，以及位於加州灣區嘅辦公室，容許員工入內工作，同時亦繼續容許員工與直屬主管商討最適合佢哋嘅工作模式。

自疫情開始後，美國多間企業，特別係一眾科網公司都相繼採用「混合辦公室模式」，簡單黎講即係唔強制要求員工返Office做嘢，而係於符合政府防疫政策前題下，鼓勵員工在家工作，讓員工與主管自行商量工作模式及地點，甚至直接關閉辦公室。

而Microsoft副主席兼首席市場營銷官Chris Capossela於昨日發表Blog文，指鑑於總部附近嘅地區疫苗接種率夠高 (約84%完成所有注射，91%至少打咗一針)，加上眼見確診後入院率及死亡率都下跌，於是決定於本月28日重新開放西雅圖總部及加州辦工室，是自2020年3月關閉後，事隔近兩年後重開。

Chris Capossela指，辦公室重開後，員工會有30日時間「調整日常工作，並採用與主管商討後的工作偏好」。佢亦強調公司了解「沒有適合所有人嘅單一方法」，所以繼續容許員工與主管商量既符合團隊要求，又能滿足個人計劃嘅工作模式，簡單黎講就即係即使重開辦公室，員工都唔一定要立即朝九晚五返Office。

另外，Facebook及Instagram母公司Meta早前亦宣佈，會於3月28日重開辦公室，員工需完成注射加強針先可以進入；Apple亦要求員工提供加強針注射紀錄，或快速檢測結果先可以進入公司範圍。而Google就於12月時指，會於今年內宣佈重開辦公室嘅計劃。

資料來源：Microsoft