為咗制裁俄羅斯入侵烏克蘭，各大西方企業都相繼宣佈會暫停俄羅斯業務，但麥當勞、星巴克、可口可樂及百事可樂早前就因為未有表態，而遭到美國民眾於網上呼籲罷買。結果四大公司不約而同地於美國時間昨日發文，指會暫停俄羅斯業務，「與無辜戰爭受害者同在」。

麥當勞以CEO Chris Kempczinski名義發文，指佢哋會「參與大家對侵略及暴力嘅制裁」，然後先用頗長篇幅交代佢哋目前做緊咩去支持烏克蘭市民及員工，然後講到佢哋喺俄羅斯有850間分店、養緊62,000名員工、數以百計供應商、更唔好提每日有幾多客會食麥記，「但同時，我哋不能忽視在烏克蘭的受難人民」，然後先講到會由即日起停止包括分店營業等俄羅斯業務，但同時為咗支持俄羅斯員工，糧就繼續出嘅。

百事方面嘅新聞稿亦係大同小異，都係交代咗佢哋喺俄羅斯有幾耐歷史、幾多員工，自己本身又做緊啲咩去幫烏克蘭員工及人民，然後就宣佈「鑑於目前於烏克蘭及生嘅可怕事件，現宣佈停止於俄羅斯銷售百事可樂，以及七喜、美年達等飲品，同時亦會停哂所有投資及宣傳活動。」

相比之下星巴克同可口可樂嘅新聞稿就簡短得多，星巴克以CEO Kevin Johnson名義發文，開首就話譴責俄羅斯攻擊烏克蘭，然後就直接話會停哂包括商品進口嘅所有業務，亦承諾會協助「2,000名依靠星巴克生活嘅伙伴」。而可口可樂嘅聲明就只有三行字，唔要啲客套說話，就係一句「會停止俄羅斯業務」。

四大公司順應民意參與制裁俄羅斯，固然係挽救美國國內嘅公關危機，但同時對佢哋盤數都有頗大影響。例如烏克蘭與俄羅斯兩地嘅分店加埋，其實佔麥當勞嘅營業額近9%，即係大約20億美金。而且生意唔做，但糧就照出，仲有協助逃難員工等支出，條數都幾襟計。