Capcom未必係機迷們最鍾意嘅遊戲開發商，但佢就肯定係目前日本遊戲從業員最鍾意、最想入去打工嘅遊戲開發商，事關Capcom於四月新財政年度開始時，公佈新嘅薪酬政策，一句講哂就係「加薪30%」！

圖片：截圖自Capcom

對唔少香港打工仔而言，過去呢幾年唔好講「加人工」，可以「出返足份人工」都已經叫還得神落。但Capcom日前就宣佈，會於4月1日起嘅新財政年度，為旗下全職永久合約員工平均加薪30%，而且連未來新入職嘅職員都受惠。其中最初級嘅社員起薪點由每月187,500 Yen (約HK$12,000)，加到235,000Yen (約HK$15,000) 加幅達25%，亦令其入職薪酬追上業界中出名高人工嘅任天堂。

圖片：Pakutaso

Capcom嘅財政報告顯示，受惠於《Resident Evil: Villiage》嘅成功，以及毛利更高嘅電子銷售增長，2021年4月到12月期間嘅公司純利，比起2020年同期增加52%，換言之Capcom係逆市搵大錢，所以先會大幅加薪以酬謝員工。另外Capcom亦同時宣佈會調整花紅計算方法，令其「更準確地反映公司業績」，有人就認為Capcom只係將花紅攤分併入月薪，但對於打工仔而言，每月必然會收到嘅人工，總比唔知有冇、有都唔知幾多嘅花紅黎得吸引。所以日本網民都紛紛大讚Capcom嘅加薪策略：「公司肯同員工分享利潤，真係會大大鼓舞作用」

資料來源：Capcom