中國特色侵權問題，唔少都係內地公司先抄襲外國品牌，然後當外國品牌進軍內地市場先嚇然發現自己已經被侵權，但結果唔單止告對方唔入，反而會被對方告番轉頭，例子多不勝數，其中就包括「籃球之神」Michael Jordan就被「喬丹體育」明顯侵權。

2012年起，Jordan其實已經向中國法院提控，控告喬丹體育侵害其知識產權，但內地一直判Jordan敗訴。直至2016年中國最高人民法院終於裁定喬丹體育註冊商標時，損害Jordan對中文名字喬丹享有嘅姓名權，違反中國商標法中，申請註冊商標時不得損害他人權利嘅規定，因此判定Jordan勝訴。

而日前，由於中美兩國簽定首階段貿易協議，其中包括中方需要承諾對知識產權提供更好嘅法律保障。有趣嘅係，就喺中美簽署協議前兩日，中國最高人民法院宣布，將「籃球之神」Michael Jordan創立嘅品牌Air Jordan與內地體育山寨品牌喬丹體育嘅商標侵權官司勝訴案，納入「最高指導性案例。」

中方有以上嘅安排明顯就係為左執行提升知識產權保障嘅承諾，而中方嘅解釋就係話為左「維護公平競爭市場秩序，對引導市場主體誠信經營，積極培育自主品牌。」唔知有咁嘅先例後，好似淘寶、新百倫等山寨品牌會唔會被告侵權呢？大家真係要放長雙眼睇清楚啦。