羽毛球世界一哥日本嘅桃田賢鬥，較早前奪得馬來西亞大師賽錦標後卻不幸遇上車禍，其中駕車司機離世，而桃田則身體多處撞傷，當中鼻樑更骨折，手術已經完成，並已經回歸訓練。

不過，最新嘅消息指桃田嘅右眼眼窩底原來亦出現骨折，其後接受手術需要再休養三個月，但之後卻可能引發後遺症，當中於未來一至兩年時間睇野都有機會出現重影問題。

作為一名羽毛球選手，桃田要經常抬頭望向上空嘅羽毛球，但如今眼睛出現重影將嚴重影響佢擊打高空波，甚至只係抬頭望向上空已經足夠令桃田感覺到辛苦。

作為羽毛球一哥，桃田本來放眼今年夏天嘅東京奧運，作為東道主球手佢本來大有機會為國家帶來獎牌，但如今卻因為意外令佢嘅競爭力大大減低。即使距離東京奧運仲有5個月時間，桃田仍然有足夠時間休養，但究竟重影問題能否消除，同時其比賽狀態能否趕得及找回將會係關鍵。

不過希望在明天，有唔少運動員因為眼窩底骨折出現重影後仍然可以完全康復，另外因為武漢肺炎問題東京奧運會否取消亦都係未知之數，雖則安倍晉三已經明確表示奧運不會取消。