2018年12月一場巔峰對決，兩位此前全勝嘅拳手Deontay Wilder及Tyson Fury走上擂台，一決勝負。作為爭奪WBC金腰帶嘅對決，一位拳風兇悍，一位技術全面，最終二人激戰12回合下，裁判竟然判定雙方打成平手，令二人戰績中首度錄得非勝利嘅紀錄。

相隔超過一年後，Wilder及Fury再度決定上擂台分勝負，二人將於本月22日於拉斯維加斯再次上演「不敗對決」，究竟今次雙方可唔可以分勝負，WBC金腰帶會落喺邊個手上，外界高度關注。

作為WBC金腰帶嘅擁有者，Wilder拳風一直強悍粗糙，就好似一拳超人咁基本上都係一擊致勝。相反，Fury則係技術流，無論係出拳定係閃避都係有原因的，所以二人對上一剛一柔變得極具觀賞性。

日前，Wilder及Fury都已經到達拉斯維加斯，並一同出席會見傳媒。

而最新雙方於台上對峙，並互有垃圾話對噴及推撞，預計即將進行嘅對決應該會充滿火藥味！