局已結！來自武肺的新冠病毒勁過生化武器，蟻民與首相一樣中招，今季英超前途未卜，榜首利物浦震騰騰，分分鐘要同首座英超冠軍含淚說再見，但原來在英國球壇內，有隊波已肯定比他們慘得多多聲，慘慘豬呀！

英國疫情一發不可收拾，英格蘭足總痛定思痛，上周決定即時取消第7級以下所有聯賽，成績全部歸零，利迷當然心慌慌，而一隊叫Jersey Bulls FC(「澤西」呢兩個字真係好邪)的球迷，怕且已經喊到唔識收聲。英格蘭足球聯賽由英超開始計，共有20個級別聯賽，並設升降班制度，總共約有7000隊左右。今季第10級別的跨郡甲組聯賽，Jersey Bulls迄今遇神殺神，所向無敵，取得27戰全勝，成績仲勁過紅軍，拋離次席多達20分，得失球差更是正92球，數字上已篤定升班。可是，英足總突然宣佈斬腰球季，Jersey Bulls白忙一季，成績就此無效，總之升班無望，同樣情況在英格蘭女子超聯亦有發生。

先例一開，究竟咁樣做算唔算公平？利迷等了30年，以為打遍英超無敵手，點知有可能輸畀病毒，真係世事如棋。聽講，若球季無法完成，英超頭10位之中，已有8隊反對頒發冠軍獎盃，何況，紅軍數字上仍未篤定封王，即使真係被監生「打劫」獎盃，看來都只能像港人一樣硬食政府的德政。

「好震驚，整個聯賽只有兩隊支持足總的方案，但球季結果卻被取消，我不希望紅軍會遭遇同一命運。」Jersey Bulls不過是業餘級球隊，但規模不太業餘，擁有3個贊助商，總裁Ian Horswell透露每年班費達27.5萬鎊，並會承包客軍作客路費，「聯賽其他球隊平均每場約40人觀戰，但我們就有700人，很難向支持者交代。」除了呢隊全勝之師，Vauxhall Motors亦已篤定升班，第7級別聯賽的一哥South Shields FC遙遙領先12分，升班指日可待，分析認為足總決定倉卒，或會面臨法律挑戰。

綜合各方消息，歐洲主流聯賽何去何從，大概有以下幾種可能性，第一，今季全面歸零，成績當粉筆字抹了它；第二，排名以暫停之前的成績決定，容許升班，不設降班；第三，透過季後賽形式決定最終成績；第四，隨著歐國盃取消，利用暑假踢完所有賽程；第五，盡早開始閉門作賽，只供直播。意大利是歐洲疫情最嚴峻的國家，《米蘭體育報》披露，除了拉素之外，兩大爭標份子祖雲達斯及國際米蘭已首肯，全面取消今季賽事和成績，同時不必頒發冠軍，很可能成為首個「由頭開始」的五大聯賽。

最後一提，現時全歐洲只剩下一個聯賽仍在進行，兼且沒有閉門作賽，那就是東歐的白俄羅斯超聯，可算是「武漢奇葩」。白俄的人口達950萬，獨裁總統盧卡申科掌政25年，揚言：「拖拉機會醫好你」，真係信不信由你。