作為一名職業運動員，理論上其最光輝嘅時刻應該就係其巔峰期階段，贏盡一切嘅將可以獲得鎂光燈照射，收入不斷，你睇下C朗拿度、LeBron James、費達拿等人就係咁。不過退役後運動員失去表演舞台及鎂光燈加成，其受歡迎程度將可能直線下滑，因此收入好大機會大幅減少(當然現在很多球星都已經有副業生意)。而有一人卻巔覆常理，佢就係「波神」Michael Jordan。

現年57歲嘅「波神」Michael Jordan於最新《福布斯》嘅財政統計，其身家達到21億美元，比已離世嘅Kobe Bryant、LeBron James、C朗拿度及美斯加埋更多，同時亦都係前運動員之中排名第一。

不過睇番Jordan作為籃球員15年期間，總收入卻不足1億美元，其中新秀年年薪只有55萬美元，而作為對比2019年新秀狀元Zion Williamson年薪高達975萬美元，足足係Jordan嘅17倍有多。當然，去到巔峰期Jordan最高年薪為當時天價嘅3310萬美元，但放於今天NBA年薪最高4020萬美元嘅Stephen Curry，都仍然有一點距離。

可想而知，Jordan在退役後嘅賺錢能力，比作為球員時更加恐佈。其中Jordan與Nike嘅合作令「波神」嘅名聲得以長存下去，Air Jordan品牌嘅年收入超過30億美元，作為品牌代理嘅Jordan每年分成相信非常和味。另外，Jordan於2010年以1.75億美元收購當時仍叫做山貓(如今的黃蜂)嘅NBA球隊，但去到2019年黃蜂隊嘅市值已達到13億美元。

在NBA賽場贏盡一切嘅Jordan，退役後轉戰商業戰場亦大獲全勝，身家暴增，不過唯獨一點可能需要改善的，就係每年為黃蜂選秀嘅眼光了...如果佢嘅眼光好少少，相信今日佢嘅身家將不至21億美元...