全球疫情大流行下，除左擔心自己中招而人心惶惶之外，大家嘅飯碗真係唔知幾時會打爛(可能有啲朋友已經不幸失業....)。而作為本地體育運動界嘅朋友，特別係一眾教練，相信早排亦感到生活異常困難，甚至為生計而被迫離開體育本業...不過當中亦有人為左理想、為左自己愛嘅運動，而咬緊牙關用創意繼續自己嘅事業，其中包括今日嘅主角 - Sphere足球會。

「別放棄，比賽還沒結束！」 - 戴志偉《足球小將》

因為疫情，香港早排將一眾公眾球場關閉，繼而令一眾體育教練無場開班，手停口停下可以點做? 我地今次請黎前職業足球員，現喇沙書院足球主教練、甲組深水埗教練及Sphere足球會主教練甄Sir，一位好有心發展本地足球嘅教練了解下。

先講下Sphere足球會，呢一間香港本地足球會主要係針對天水圍區嘅小朋友，原因係甄Sir以往做教練期間發現天水圍區當時並無為青少年/兒童設常規嘅練習，所以決心立志將自己嘅專業帶入呢個別人眼中嘅「悲情社區」，希望令當區小朋友可以更容易接觸得到正規嘅足球訓練。同時，甄Sir希望可以將足球嘅正能量注入呢個區，從而改變大眾對呢個地方固有嘅負面標籤。

同傳統足球球會相比，Sphere足球會有一樣非常明顯嘅分別，就係佢地堅持唔對學生進行選拔，佢地認為每個小朋友都應該有一個平等機會去踢波，從而讓天賦不足嘅學生仍然有機會享受踢波嘅樂趣。

雖然Sphere足球會上下都好有心，但面對世紀疫症要堅持真係唔係把口講就得，球場全部閂晒點繼續教小朋友踢波? 又有限聚令咁點搞? 甄Sir就表示馬死落地行，佢曾經喺屋苑入面進行單對單嘅教授，教得一個得一個。另外一眾教練亦都會喺屋企開Zoom同學生展開訓練，其中包括喺鏡頭前面示範腳法，然後學生跟住做，亦都會開住Zoom齊齊做體能，實行疫境自強，在家都要保持身心健康。

而除左教導學生足球技術外，Sphere亦非常著重學生同家庭嘅關係，佢地會不時舉行活動拉近親子關係，好似母親節學生會送花比媽媽，父親節又會邀請爸爸到場睇比賽等等，令學生技術德行並行。

未來困難可能仲會有好多，但係「放棄」兩隻字從來都無喺甄Sir嘅字典入面，佢嘅目標係希望持續建立天水圍嘅足球文化，增加呢個區嘅足球人口，並期望2027年可以將Sphere成為職業球隊，令更多呢個區嘅人鍾意足球，特別係本土、本地嘅足球！

#撐本土 #撐自己人