過去幾年一直就侵權進行訴訟嘅「籃球之神」Michael Jordan及內地品牌「喬丹體育」，繼今年4月判「喬丹體育」終審敗訴，要從服装、鞋、帽等商品，撤去「喬丹」二字之後，日前再判Jordan勝訴，「喬丹體育」需將品牌「喬丹」二字撤走，兼作出賠償。

對於今次裁決，法院表示「喬丹體育」擺明係有意借用Jordan之名及其類近嘅Logo商標去混淆公眾，令市民以為其公司與Jordan有關連，所以認定「喬丹體市」侵害原告人Michael Jordan嘅姓名權。

而結果，法院要求「喬丹體育」在其品牌所有項目中撤走「喬丹」二字，並要在報紙及網絡上公開向Jordan道歉，同時要賠償Jordan 30萬人民幣幣神損害金及5萬人民幣訟費。不過因為「喬丹體育」部份商標已經過左《商標法》5年嘅爭議期，所以已經變成不可撤控嘅商標，但法院仍要求「喬丹體市」要以合理方式將個啲商標與Jordan分隔開去。

其實雖然今次法院判處「喬丹體育」敗訴，但事實上佢嘅損失唔算非常大，對於呢間偷用Jordan名氣以達致市值以十億，甚至百億計嘅公司，35萬嘅賠償真係濕濕碎，當然對於Jordan亦都一樣，再加上其商標唔需要完全撤走，所以對其影響唔會太大，只係形象可能變差，或短期內影響其上市計劃。但人始終善忘，所以可能隔一排「喬丹體育」又會捲土重來，繼續成為體育品牌巨頭之一。