唔少人都鍾意一路做嘢一路聽歌，但你對於聽咩歌又有冇講究？近日有台灣網民發現，原來國泰世華銀行早喺1月尾就推出咗幾首以「數錢」為主題嘅音樂，當中除咗有輕鬆嘅旋律之外，竟然仲加入咗不同國家銀紙嘅數錢聲，網民就笑言聽得多有助提升財運。

圖片：截圖自 國泰世華銀行 on Spotify

件事係咁嘅，早幾日有台灣網民無意中發現國泰世華銀行竟然有Spotify帳戶，好奇之下撳入去就見到一個名叫「Gold Noise」嘅歌單，入面有「美金的聲音」、「新台幣的聲音」、「歐元的聲音」、「日圓的聲音」以及「人民幣的聲音」五首長達10分鐘嘅音樂，實際上就即係數錢聲再加上不同主題音樂，例如「美金」就配R&B、「歐元」就配交響樂咁。而歌單中另外兩首只有30秒嘅「手數鈔的聲音」以及「數鈔機的聲音」，就係顧名思義嘅音效黎。

再仔細查一查，原來國泰世華銀行早於1月尾就已經於Youtube上載「Gold Noise」所有歌曲，個播放清單嘅簡介叫大家「需要財運的時候聽，讓錢錢更想與你相處」、「閒閒無事的時候聽，讓錢錢知道誰是歸宿」。目前Youtube上以「新台幣的聲音」最受網民歡迎，有近10萬次觀看，大家都話有家鄉味；而「美金的聲音」首歌就似乎最多人鍾意，以8萬幾次觀看隨後。而歐元、日圓，以及唔少香港藝人都想聽嘅「人民幣的聲音」就大概有4萬令次觀看。