曾幾何時，巴塞羅那件波衫就係一件藍紅相間、全無贊助商Logo嘅波衫，直到2006/07球季，波衫上先出現聯合國保護兒童基金會 (UNICEF) 嘅Logo，當時亦係以做善事嘅名義，巴塞實際上係「捐」咗個波衫位黎宣傳UNICEF，但自2011/12球季起，巴塞羅那波衫就正式出現商業機構嘅商標，先有2011-2016年嘅卡塔爾航空，再到沿用至今嘅日本樂天 (Rakuten)，黎緊就會變成音樂串流平台Spotify，而且今次連魯營球場嘅命名權都賣埋出去。

圖片：巴塞羅那足球隊官網

巴塞官網於香港時間今早宣佈，董事會已批準Spotify成為球隊未來四年嘅主贊助以及「官方音樂串流伙伴」，由下球季起巴塞男、女子足球隊嘅波衫就會改印Spotify標誌。與此同時，球會亦首次出售魯營球場嘅命名權予Spotify，黎緊7月會正式改名成「Spotify 魯營球場 (Spotify Camp Nou)」。

官方聲明指雙方合作嘅願景係「創造一個協助藝人與全球巴塞Fans們互動嘅平台」，「利用球場內嘅宣傳空間，將藝人們的作品帶畀觀看巴塞比賽嘅全球球迷。」

圖片：巴塞羅那足球隊官網

值得一提嘅，是次合作仲需要經過「指定外部會員大會 (Extraordinary Delegate Members Assembly)」投票通過，不過考慮到據報四年合約價值3.1億美金，加上巴塞近年財困，相信通過並非難事。另外據報巴塞本來係希望開個更高嘅價錢，但奈何實際上有登記成為官方巴塞會員嘅人只有350萬，對比起估計全球有3.5億巴塞Fans只佔1%，所以叫價未能更高。