籃球場用黎打籃球就梗架啦，但係近年籃球場就多左一個用處，就係去打卡啦。就好似如今嘅人氣室內街場「啟業運動場」，就除左多左好多人打波之外，亦多左好多人去打卡或者拍野。

翻新籃球場呢個風氣近日越黎越盛，其中一個日久失修嘅籃球場 - 青衣籃球場，就被重新塑造成全新打卡球場聖地。今次青衣籃球場翻新，就由《NBA x 軒尼詩》合作，聯同基滙資本民坊、香港藝術團體HKwalls，並由駐港街頭藝術家TAXA設計製作，為各位波友帶來全新刺激 - 「Hennessy In the Paint」。

是次設計以本地彩繪元素為主，以藍色、桃紅色以及湖水綠色作球場嘅色調，結合NBA及軒尼詩方面嘅感覺。而球場最特別嘅設計，就係藝術家TAXA喺球場地板畫出一雙手臂延伸至球場邊界，象徵著球場上渴望觸及目標嘅熱情，而球場邊界嘅箭號就代表自然山景、球場上下兩邊則為香港天際線、同樣在場邊嘅漸變色圓形則象徵城市璀璨奪目嘅燈光，當中極具深意。

球場位於停車場天台，但由於車場屬舊式的，所以並未有電梯供波友上落，大家要留意啦!