如果要形容2020年，大概用一句「真係估佢唔到」就最適合不過。但「估佢唔到」都有分好事同壞事，其中一樣估唔到嘅「好事」，就係日本著名設計司山本耀司即將與意大利超級跑車品牌林寶堅尼合作，推出聯乘系列！

據《Hypebeast》報導，雙方目前只係公開咗一份簡短新聞稿及兩張相，第一張就見到充滿山本耀司格調、改成黑白色嘅林寶Logo，下方再有山本耀司嘅簽名；另一張就係黑紅花紋、再加上「呵呵大笑」、「カカ大笑 (前兩個字係日文黎)」「百發百中」及「文明開花」等字樣嘅圖案。並無透露是次聯乘究竟係會出啲咩產品。

由於山本耀司曾經講過自己好鍾意舊車，甚至直指「依家啲車好樣衰」，所以相信是次聯乘將會係由山本耀司重新設計一架經典林寶跑車。山本耀司更指是次合作會反映出兩個Brand嘅「傳統」及「DNA」，亦提及「遺跡」、「熱情」、「工藝」及「創新」等字眼，並指聯乘作將會係一件「藝術品」。