Supreme 最出名、最常見嘅產品就係心口一個Box Logo嘅T恤，而且由1994年起出過唔同衫顏色、Logo顏色、再加各種聯乘，加加埋埋出過數唔到咁多件——不過Supreme收藏家James Bogart就數到，佢話係253件，而且佢件件都有！呢個收藏仲會放上佳士得拍賣會中競投，預計成交價高達200萬美金！

據James Bogart於個人網頁中講，佢由2014年Supreme開店時就已經有留意、有買呢個Brand，到2015就開始一出新產品就買，後來「興趣變成執著」，於是除咗不停買新出產品之外，仲會花幾個星期甚至幾個月嘅時間，去搵佢自己冇嘅款式，最後儲下儲下就儲出呢個完整收藏。

收藏中除咗有最早期推出嘅紅Logo白衫經典款，仲有多款產量奇低嘅聯乘款，例如1996年Supreme與WTAPS推出嘅迷彩Logo白衫款，總共只係出過30件，淨係呢件衫已經值12,800美金，即係差唔多十萬港紙。

如果大家想知多啲關於呢個「The Box Logo Collection」，就可以去返官方網站或者James嘅Instagram慢慢欣賞。