疫情令各大時裝品牌冇辦法舉辦有人入場睇嘅實體Fashion Show，唔少品牌就用網上直播黎做解決辦法，但亦有啲品牌係真正擁抱虛擬世界。好似Balenciaga咁，就將會於12月初推出名為《Afterworld: The Age of Tomorrow》嘅遊戲，去公佈2021年秋冬系列。

雖然個名好似啲咩動作大作，而且據《WWD》報導，隻Game係關於「2031年，英雄替身穿梭於不同地區完成任務及互動」(基本上所有遊戲都符合呢個形容)，但你睇埋個主題係「展示自然及工業慢慢回到平衡」，而且提供「發生於虛擬烏托邦嘅現實呼吸訓練」，相信呢隻可以用網頁玩嘅遊戲，應該係節奏非常放鬆、更為著重個氣氛——同埋唔好唔記得隻Game係為咗展示Balenciaga嘅新衫，所以你就唔好期待佢會好好玩好刺激畫面好好咁啦。

而時裝品牌進軍遊戲界亦唔係新鮮事，早前LV就與《League of Legends》合作，唔單止幫個世界賽獎杯整咗個盒，又幫入面啲英雄設計特別Skin，現實中又推出返同款產品。之於今次Balenciaga自己整隻Game出黎效果會點呢？就要等到12月6日隻Game正式面世啦。