Thom Browne香港「辨公」

文：MenClub jimjimmay　　圖：MenClub
POSTED ON 22 Apr 2015

美國時裝品牌Thom Browne，近幾年快速上位，其標誌性設計，如灰色西裝、wing tip款皮鞋及綴上三間標記嘅眼鏡（眼鏡絕對係重災區，只要一推新貨就好快賣斷市），只要是Thom記出品，信眾們定必以狂風掃落葉姿態掃貨。

品牌成立初期，已經開始引入Thom Browne嘅本地時尚老大哥JOYCE，眼見品牌呢幾年人氣持續高企，無任何回落跡象，對於為品牌開設香港、甚至大中華地區首間專門店，只是遲與早嘅問題。

各位Thom Browne粉絲們，終於等到今日嘞，請大聲歡呼兼拍爛手掌，熱烈祝賀Thom Browne專門店正式在香港開張大吉，新店位置喺安蘭街街尾，正好與上星期剛開張嘅Rick Owens做鄰居，兩個人氣時裝品牌拍住上，將這條街的時尚香火燒得愈來愈盛。

彩色凹凸紋理圖案西裝褸 $24,500
橙藍色花紋圖案恤衫 $5,300
彩色凹凸紋理圖案三角骨褲 $17,000
淺灰色框眼鏡 $4,700

衫身label、眼鏡上的三間條案、衫身剪裁，都是品牌嘅簽名式設計

Thom Browne新店設計風格，與Rick Owens所採用嘅工業風截然不同，室內裝潢因循品牌位於紐約總店嘅簡明路線，將店舖打造成一間近似五、六十年化嘅辦公室模樣。新店樓高三層，包括地下大門口，都被一組組白色百葉簾包圍住，連假嘅人形模特兒都唔擺一個，稍一唔留神都會行過龍，搵唔到入口。

店舖門面都用上百頁簾，想搵招牌名都幾難吓

要將整個空間打造成舊時辦公室格局，品牌就非常有誠意地，引入Paul McCobb、Edward Wormley及Pierre Jeanneret出品，三組品牌嘅傢俱風格，出晒名retro味濃烈，木製辦公檯、（扮破舊）藤椅、鏡面屏風等，配合白燈光管，整體氛圍，非一般時下零售店格局。

身為大中華區頭號專門店，亦都係亞洲區內第三間專門店（繼東京南青山及首爾），全場只賣男裝及配飾系列，貨品堪稱至齊全，尤其呢期最多人追捧嘅眼鏡系列，以及品牌簽名式灰色西裝早就歸位俾粉絲供奉，而今個春夏季主打嘅floral print及條子西裝，亦都已經列晒陣，襯好晒一套套任君選擇，相當有氣勢。

灰/白/粉紅花紋圖案西裝褸 $14,000
灰/白/粉紅花紋圖案西裝褲$11,000
紅藍色花紋蝴蝶圖案T裇 $3,800
紅/白/藍猄皮皮鞋 $8,300

紅/白/藍條紋外套 $13,600
藍色綴條紋恤衫$3,600
紅/白/藍橫紋圖案西褲$8,900
紅/白/藍猄皮皮鞋 $8,300

不過講到氣勢，點都唔及全場最貴、最奢華，價值29萬港元嘅鱷魚皮手袋，暫時全世界唯獨新店率先發售，實在係俾足面香港粉絲，同時間，由美國總公司空運幾套非賣品show pieces抵港，俾香港傳媒近距離接觸大師真跡，剪裁十足十大隻佬上身，利用布料展示肌肉紋理，雖然好玩唔好著，但呢種就係Thom Browne嘅致勝之道，天橋上設計繼續天馬行空draw attention，天橋下嘅設計就繼續玩modern classic。