大概二月份期間，nike透過官方網站（nike.com）放風，話Michael Jordan會同某位佢嘅老死重聚，再次合作現身粉絲面前，以作為Jordan Brand30周年紀念活動之一，「搶錢」活動肯定陸續有來。

嗰位仁兄老友，咪就係當年嘅電視界紅人，卡通界長青機Bugs Bunny囉！

成日牙尖咀俐，隻眼生係額頭到嘅Bunny，但偏偏同到Michael Jordan做朋友，又真係吹佢唔漲，兼一齊喺1992年，首度推出聯乘系列——「Hare Jordan 」。

一段友誼能夠維繫到23年的確厲害，仲要兩位都係明星，一位喺籃球場上戰無不勝嘅體育明星，一位喺Warner Bros入面嘅卡通紅人，能夠走埋一齊咁耐，呢種緣份的確有需要紀念一下。

官方就正式宣佈，今個周末，Jordan Brand將會推出第一款Hare Jordan周年產品——Air Jordan 1 Mid Hare，鞋款設計由白、銀兩色組成，出處明顯由Bugs Bunny嘅身體毛髮顏色而來，七彩鞋舌就當然喺佢最鐘意食嘅紅蘿蔔顏色啟發啦，而鞋舌同鞋尾分別都印上Jordan Brand嘅標記，鞋跟部位就印有「HARE」字樣以茲識別。售價$969

嚟緊仲會推出運動衫系列，粉絲請預備定銀彈掃貨。

除咗推出紀念產品之外，官方仲專登搵嚟體育媒體界的傳奇人物Ahmad Rashad，扮同Bugs Bunny進行採訪，講吓Michael Jordan以及Jordan Brand的最新合作，當然會打吓溫情牌，重溫佢同Jordan多年友情片段。

Jordan brand store
灣仔莊士敦道25-33號地鋪C