你可以整容將自己變靚啲 ；

你可以搽生髮劑增髮；

你可以裝假肌肉變大隻，

不過，要改變一個人嘅高度，似乎無太大可能，唔通真喺要駁骨先掂？

咁又唔駛去到咁盡，只要好好利用衣著襯搭掩眼法，例如：

a.拉番好身型比例

b.千祈唔好諗住利用一啲大件飾物引人注意（咁會適得其反）

c.愈簡單襯搭，愈最適合身型較矮嘅男士

除此之外，一個男人有自信都好緊要，正所謂志氣比天高！以下7項「增高」貼士，記得袋穩：

1.宜襯搭單色

為咗突出你嘅身型線條，適宜選擇單色服飾，尤其是深色衫，可以掩藏身高上缺憾。

當然，不一定「著全黑」，只要盡量將全身顏色單一化，別將身型分成兩截就OK。

2.宜穿垂直線條圖案

「直間著瘦人，橫條著肥人」呢種著衫之道其實好片面。

需知道，人嘅視線，會自然追隨條紋方向，

所以當你著直條上身，愈能產生錯覺，將閣下身型拉長。

3.宜穿fit身剪裁

身型較矮嘅男士，要多著fit身剪裁衣物，一旦著上闊身剪裁衫褲（尤其大褸），只會令整個人更累贅，講得直啲，更加矮。

關鍵係：買褲時，褲腳唔好留太多吋，以免褶位太多，望落將雙腳變短。

4.認清自己身型比例

身型較矮，無須刻意緊跟身型較高者的比例要求，呢點好重要。

傳統上，穿西裝外套時，裇衫要外露半吋袖長，但對身型較矮者就無須跟隨，因為無必要有太多明顯層次。

5.細節集中上半身

一條鮮色領呔或袋巾，可將別人視線集中到自己上半身。但係，切記！切記！適可而止，

飾物一件起兩件止，以免造成雜亂無章。

6.褲要及腰

想自己有酷似長腳線條，可以揀選有較長褲管嘅長褲，將腰帶束上一點。

當然，最緊要自然及腰，意思是腰帶扣上時剛好束緊，

a.千祈唔好著到條褲好似「瀨屎褲」咁

b.千祈唔好有抽住「蛋蛋」嘅不雅感覺，

否則，只會縮短身型比例，陰功！畀咗錢仲要畀人笑。

7.過份「增高」得啖笑

「增高鞋」及「增高鞋墊」被不少男士視為無敵裝備，亦有唔少人著緊。不過，千祈唔好貪心，別在「增高鞋」之上再加「增高鞋墊」。唔好笑，朝早喺地鐵站或傍晚嘅蘭桂坊有好多呢類反面教材，遠望以為佢著咗高踭鞋。