由宣布品牌會大肆慶祝踏入第40個年頭開始，Armani真喺無時停，首先，喺官方網頁設立周年專區「Armani.com/Atribute」，每個星期（！！）都會推出全新主題嚟回顧過去，總之包攬品牌嘅主題、人同事，為期 40 個星期（！！），以代表Giorgio Armani走過嘅每一年。

最厲害要數剛剛落成，位於米蘭嘅Armani Silos博物館（前身喺Nestle factory），館內集合共600套服裝、和200件配飾、手稿以及歷史照片，將Armani平生嘅思維創作一次過公開，俾年輕一代時裝師體驗何謂時裝永恆、經典之美。

至於最新一輪攻勢，就喺推出Giorgio Armani Evening Capsule男裝系列，將品牌打遍天下無敵手嘅禮服經典設計，再次優雅地展示人前。

黑色和深藍色嘅禮服，不嬲最得gentlemen歡心，皆因耐穿易襯，幾乎一套西裝足夠橫行各大場合，Armani深明此道，capsule系列內，黑同深藍色就一定有份，而每套衫都會飾有經典細節，包括緞面細節、飾以羅緞細節及飾以天鵝絨細節。

當然，Armani天生潮流觸覺敏銳，設計上都會混入現代元素，包括圓點及迷彩圖案，唔會令燕尾服過份老氣。懂變通，先至可以喺萬變嘅時裝界，逗留得越耐。

Giorgio Armani Evening Capsule男裝系列將會6月起在品牌專門店有售。