其實，小編對於主人幫自己嘅寵物著衫，抱有懷疑態度，明明佢哋擁有動物性，可以天生天養，但主人們就可能為咗保暖，又或為咗幫寵物扮靚等各種原因，幫佢哋著衫襯飾物，望落好似將佢哋束縛住……但當我讀到「Menswear Dog」一書，即時將呢種想法拋諸腦後！

Bodhi主人夫婦（左）David Fung及（右）Yena Kim

一對來自紐約嘅夫婦Yena Kim及David Fung，前者曾為Ralph Lauren設計師，而後者則從事平面設計，佢哋兩人運用自己嘅時裝觸角及設計頭腦，為寶貝柴犬Bodhi襯上男主人服飾，無論春裝及冬裝、皮褸或背心、禮帽與賊仔帽乜都著過。

每日，兩位主人就將Bodhi著男裝嘅相post上Facebook，同時命名為「Menswear Dog」，見反應唔錯，又開埋Tumblr及Instagram戶口，直至今年四月，已吸引175,000人follow，隨後仲出埋書，書名叫《Menswear Dog Presents The New Classics》，型到爆燈之餘，Bodhi可愛度滿分。

兩位主人笑到，以為寶貝柴犬唔會理佢哋兼走咗去，但佢又真喺乖乖坐喺度，由得佢哋兩個幫手襯衫兼扮pose影相！非常神奇。