成日都叫身邊人早睡早起，但又有幾多個喜愛夜蒲嘅香港人會聽，明明第二朝七點要彈起身返工，但有本事睇埋《大時代》先肯瞓，即係計計埋埋都係瞓得5、6個鐘，就算第二日你夠精神撐起身返工，但你塊面肯定未到12點就乾到出油，兼暗啞無光。

一班又唔想早瞓，但又唔想皮膚殘落去嘅男士，有乜解救方法？唉，醒4招俾你哋早上極速補水完先出門口啦！

1.蜂蜜水排毒
一早起身就灌杯蜂蜜水，相比起淨飲白開水，更加可以將體內毒素迅速排出，亦同時間滋潤返你dry咗成晚嘅肌膚，如果你無乜胃痛前科嘅話，可以試吓加埋檸檬汁，以補充維他命兼美白，一舉三得！

2.早晨一面膜
如果你發覺塊面真係極度dry爆，面臨甩皮嘅境地，咁真係走唔甩，你要敷返個paper mask，幾趕時間都要敷夠5分鐘先好出門口（建議「開大」時順手敷埋慳時間），以最快速嘅方法灌水入肌膚之中，但記得要拍上爽膚水作導入源先好敷，咁至夠水潤。

3.清水洗面
瞓覺時候，皮膚都不斷進行新陳代謝，所以，每朝早瞓醒之後都成面油，加上家陣天氣熱，開冷氣瞓覺會抽走肌膚水份，致更加缺水，但朝早時段，又不宜用洗面乳潔面，怕傷害肌膚表層保護膜，所以呢，朝早最好就咁用清水，以怕打形式潔面，可以清除表層油脂外，亦可收緊毛孔，兼且保留肌膚內的水份。

4.善用精華
明白男士們都希望護膚程序越快越好，咁如果真係遇著捱夜，皮膚特別乾嘅時候，又想以最快捷嘅方法補充水份，咁就即刻用護膚精華搽面，搽之前亦最好用雙手先搓至微暖，幫助肌膚加快吸收。