呢股球鞋熱，真係幫助咗唔少之前備受遺忘，但其實又唔錯嘅球鞋品牌再次回歸，源自日本嘅Onitsuka Tiger就肯定係其中之一，而佢嗰款最經典嘅白底藍紅間Mexico 66，你肯定有印象，佢將再次歸位，湊吓呢場白波鞋旋風。

不過呢，Mexico 66由1966年面世之今，佢陣東洋味當然可以流芳百年，但都坐陣咗招牌位置咁耐，一路咁食老本都唔係辦法，於是品牌就趁住呢陣球鞋熱強勁，將Mexico 66再度翻新，變成Mexico 66 Paraty，鞋面設計會用到另一種日系美學手法，從手繪水彩金魚及壓製乾花卉得到靈感，好有種季節變奏嘅感覺，鞋款亦會變成無鞋帶及可踩踭設計，整體造型對比舊有經典造型嚟得搶眼。

各Mexico 66 Paraty鞋款 售$790

Mexico 66 Paraty嘅造型對於舊客仔，可能會被嫌棄變得太勁，but唔緊要，走復古慢跑鞋路線嘅Serrano都依然可以係佢哋杯茶，專登加推新色，黑白、黑黃配色，依然維持日本復古風，要經典有經典。品牌雙線發展，照舊吸客。

各Serrano鞋款 售$750