都知家陣零售業營運艱難，品牌們都出盡發寶，嘗試止血之餘，兼諗計仔發掘新銀根，但奈何家陣經濟比我哋想像中更差，過往非常受年青人歡迎嘅時裝品牌American Apparel，近日傳出有可能倒閉危機，現時已正式對外宣佈將會削減全球店鋪數目，咁自然就包括埋裁員。

品牌之所以會面臨如此重大危機，都拜前CEO Dov Charney留落嚟嘅「蘇洲屎」，因為佢之前牽涉多單官司，只係堂費都俾獲金，又成日拍埋啲勁Sexy廣告搞到品牌形象每況愈下，想要「洗底」都唔係咁容易。

由於以上種種關係，品牌要用非常手段節流，決定未來18個月極速「減磅」，成本起碼總共要削減3千萬美元，節流之餘亦要開源，關閉營業額數字未如理想嘅同時，都會係盈利較過嘅地區開新店，加快搵錢效率。

不過呢，品牌高層都鋪定後路，講到明如果係一年次內收入無明顯進賬或額外資金嘅話，都可能令公司出現倒閉危機，當然，高層會諗定辦法搵資金，但就唔寫包單。無計啦，家陣咁多大型「時裝速食」品牌出現，又Zara、H＆M、Topshop、Forever21等等，爭崩頭情況下，唯有汰弱留強啦！