香港夏天愈嚟愈熱，唔少男生都頂唔順，過往唔肯踏出第一步嘗試著涼鞋嘅人，而家都轉投涼鞋懷抱，暫時同最愛嘅波鞋say goodbye，當然，亦要感謝時裝品牌們通力合作，將涼鞋設計不斷改良，款式傾向unisex，包括現時最受歡迎嘅草織底涼鞋、搭帶涼鞋、Pool Sliders。

草織底涼鞋

其實早係4、5年前，草織底涼鞋（espadrilles）已經係女性市場慢慢崛起，直到前2年，呢股草織熱潮仲吹埋去男子組，最落力谷起草織底涼鞋市場嘅美國品牌TOMS，推出超多款式選擇，顏色物料配搭花多眼亂之外，佢可以唔駛露腳止都夠晒通爽又夠輕巧，小編知道，都有幾多男生唔like露趾鞋，呢款就合晒心水。

搭帶涼鞋

Birkenstocks呢期重振雄風，佢最易handle嘅搭帶涼鞋款式，人氣指數爆燈，幾乎人人要有一對咁滯，新襯法不外乎加對短襪仔就出得街，加埋年青人最愛品牌之一Dr Martens都跟隊，推出差唔多嘅款式，不過就加厚底，易襯度超高，相信，呢陣搭帶涼鞋熱潮會繼續有得去。

Pool Sliders

好突然地，Pool Sliders未到夏天已然人氣高企，多得男神如余文樂幫手帶起熱潮，將呢款原本只係for運動友而設計嘅拖鞋，被推向潮流圈內，繼而，連高級時裝品牌如Valentino都一齊湊熱鬧，家陣真係愈casual look啲人就愈buy。