鮮色撞鮮色

成日覺得Polo裇娘娘地，一大死因就係因為你覺得佢來來去去都係得黑白灰呢類單調顏色，但實情佢係有七彩咁多色俾大家選擇，點解你又唔試吓玩撞色呢？怕過火？只要用啲同色系配飾，例如皮帶、皮鞋嚟平衝吓就無問題啦！

西裝Smart襯

大熱天時，西裝入面又要著件裇衫都真係唔講得少，不如試吓用短袖Polo裇嚟襯，將領位收好，扣好鈕扣，「涉」好件衫，加埋袋巾，出嚟嘅效果依然可以好官仔骨骨，同襯裇衫無乜分別，戴埋副眼鏡直頭無得輸。

公子哥兒look

男士們怕失手，tone-on-tone襯法就最好，亦客易啲打造公子哥兒look，最先要選擇fit身嘅衫褲，著得整齊，小編傾向將Polo裇「涉」好，外披件薄外套上身，怕熱嘅話下身可襯短褲，踩對loafer，最緊要記得gel好髮型，因為要引出Polo裇嘅貴氣味道，貼服嘅髮型好緊要。

英倫街頭風

Polo裇同紳士帽其實係好朋友嚟嫁，尤其是你想營造英倫街頭風，當你諗唔到點樣襯件Polo裇嘅時候，頂帽就係你嘅救星，同時，記得要扣晒Polo裇嘅鈕門，下身著件skinny jeans，咁先最入型入格。