航拍起飛　安全學玩無人機

文：MenClub Patrick　　圖：MenClub
POSTED ON 02 Jan 2015

早幾日睇新聞，話而家遙控無人機流行到，美國有大學特登開辦學士課程去教人操控呢啲無人機。可能有啲人會話：唓！咪又係遙控飛機，使唔使呀？其實喺香港都發生過有人俾遙控直升機打傷頭部、搞到傷者半身不遂嘅意外，所以玩呢家嘢真係唔能夠忽略安全性㗎！尤其係當航拍愈嚟愈多人玩，啲無人機就愈賣愈平，好多人當正佢哋係玩具咁玩，去舖頭買咗架機，乜都未學過就放上天，真係又要學司徒法正話齋：出事㗎嘛！趁住近日有機構搞咗個航拍機師入門班，筆者就請教咗導師Benny一啲航拍法例同操控無人機嘅tips，再同大家開心share。
遙控無人機導師Benny
Check機篇今次Benny用嚟示範嘅係四槳機DJI Phantom 2 Vision+，機底本身已經配備埋鏡頭，亦有得用手機app睇住嚟操控，屬於入門級別，正正係多數新手會玩嘅機種，不過佢都內置齊GPS、指南針、陀螺儀等最需要用到嘅裝備。Benny話起機前一定要check check兩樣嘢：
1. 留意GPS 首先一定要check吓收唔到到GPS，點check？其實就咁擺部機喺地，將手機駁落遙控器開着Vision+個專用app，GPS就會自動啟動，然後就會見到右上角個衛星icon着燈，隔籬仲會有數字顯示接收訊號級數。其他機款都會有燈號提示。好似呢張圖咁，右上角盞衛星燈冇着嘅話，即係收唔到GPS，唔好飛。
2. 檢查螺旋槳其次仲要check吓4隻螺旋槳，如果發現有披口就要換咗去先，事關上到天會影響平衡。新手最好喺4隻螺旋槳外圍加裝埋呢啲環形保護器，咁就冇咁易撞爛槳或撞到披口。
開機篇千祈唔好乜都理就㩒着部機一二三飛上天，其實每次起飛前都仲有事前工夫要做，就連開機呢個動作都有嘢要注意。
1. 切記先開遙控器記住未着無人機，要先開遙控器，任何機款都要咁做。因為先開着無人機嘅話，佢可能會收到附近其他機遙控器嘅訊號，跟住飛咗去，咁就大鑊喇。
2. 校正指南針每次起飛前都要做一個俗稱「拜四角」嘅動作，用意係要校正無人機入面個指南針，確保佢嘅方向正確，跟住無人機用指南針同GPS訊號做對比，就能得到最準確嘅定位效果。校正步驟如下：先啪遙控器右上方粒S1掣5吓。然後水平咁拎住架機轉兩至5個圈。再打直拎住架機，轉多兩至5個圈，完成。
操控篇 Benny話除非係六槳或八槳嘅大型機款，否則操控都唔算困難，架機上到天若想控制自如，同埋影相拍片想靚少少嘅話，只需記住兩件事。
1. 鏡頭tilt低少少 Vision+或其他機個鏡頭如果set到完全向前嘅話，有機會拍埋前面一對螺旋槳入鏡，尤其係裝咗保護器嘅話，就更加難避。所以鏡頭就校到唔好完全向前，向下tilt低少少就最正。
2. 機頭永遠向前多數無人機嘅機頭都係用紅燈做指示，架機上到天之後，紅燈永遠向前，機尾對住自己，咁樣操控就一定準確順手喇。雖然夜拍時啲紅色指示燈光都可能入埋鏡，但Benny話影響好微，可以不理，除非操控技術熟得好緊要，否則唔建議搵嘢遮住啲燈。紅燈向前就係機頭向前。
救機篇萬一無人機喺空中失控或者冇電，咁點算呢？Benny話其實都唔使太驚嘅。
1. 失控就放手若然架機係喺高空失控，其實乜都唔使做，放晒手就得，佢就會自己穩定番，停留喺原來位置，再等下一步指示。
2. 撞人要飛高假如架機係喺接近地面嘅高度失控，附近仲要有人，最妥當嘅做法就係立即將架機攀升，咁就最少機會傷到人。
3. 冇電自己返屋企 Vision+等內置GPS嘅機款，多數都有自動回家嘅功能，即係萬一架機喺空中飛到少過某%嘅電量，而你又冇收佢返歸嘅話，就會靠起飛時嘅定位，自己返屋企，所以起機前check GPS係咁重要。其他機款都至少set到低過某個電量就沿地慢慢降落，所以唔使擔心，除非咁啱飛到喺水面。呢個功能如果附近太多建築物就會失效，所以應該盡量去空曠嘅地方放機。
法例篇喺香港玩無人機，唔使Benny提，大家都知要留意民航處制定嘅法例啦，唔係可能俾人拉㗎！
1. 飛行高度限300呎喺冇申請嘅情況下，無人機飛行高度限於300呎內（約100m）；飛行距離就冇明確限制，不過建議係肉眼望到嘅範圍內。而無人機同搭載嘅攝影機，總重量不能多過7kg。 Vision+預設已經有300呎高度限制，你想夾硬飛高啲都唔得。
2. 機場維港唔飛得機場範圍5km內，同埋維港兩岸，無論任何時候都係禁飛區。但其實Vision+等機嘅GPS系統，已經對全球多個機場範圍進行封鎖，你想飛架機都飛唔到。
地點篇但唔係法例冇話唔得嘅地方就放得機㗎，Benny話仲有好多地方都唔應該玩無人機。
1. 多人多樓都要避 Benny話無人機盡量唔好喺人群上空飛過，室內或者四周有太多大廈嘅地方都唔應該飛，因為GPS準繩度會大幅降低；仲有發覺太大風同埋附近有電纜，都梗係唔好飛啦！見到附近有電纜就唔好飛喇。
2. 建議地點民航處列舉咗元朗大棠、南生圍、沙田大老山、將軍澳、清水灣半島一帶都係建議玩無人機嘅熱點，Benny都叫大家不妨去多啲呢啲地方放機。