早幾個星期就同大家報導過，擁有2k Games及Rockstar Games嘅Take-Two Interactive 宣佈，旗下而向新世代主機嘅遊戲《NBA 2K21》會加價10蚊美金，到US$69.99，當時業界都認為會係新世代遊戲加價嘅序幕，點知事隔兩個星期，Take-Two CEO Strauss Zeinik就話可能唔係隻隻Game都加啦喎。

Strauss Zeinick於日前一個財政電話會議中指，「遊戲價錢一定會逐隻逐隻公佈」，換言之即使《NBA 2K21》真係加價到US$69.99，亦唔代表Take-Two其他Game會加價。另一邊廂，Ubisoft就講到明今年秋天出嘅新世代遊戲唔會加價。

實際上，美國遊戲市場雖然冇任何價格管制，但過去多年黎即使橫跨幾個主機世代，各大遊戲開發商都好有默契地將遊戲價格定喺US$59.99，顧客亦習慣咗呢個價錢。但隨住遊戲開發成本上漲，遊戲開發商有加價壓力但又唔敢加，結果造就近年盛行嘅「Game內課金機制 (Microtransaction)」。但課金當然都有其不足，亦唔係每隻Game都用到，所以遊戲本身加價係必然嘅事。

不過隨住Strauss Zeinick對全面加價留有餘地，似乎遊戲開發商都唔想做最先提出全面加價嘅嗰個。