據《華爾街日報》報導，自上年疫情爆發後，全球各地愈嚟愈多少女因為身體不自主抽動（Tics）而紛紛求醫，暫時未知病發原因，不過有醫生就懷疑同患者疫情期間睇抖音（TikTok）片解悶有關。

由於少女患上「抽動綜合症（Tics）」情況實屬罕見，起初治療運動障礙嘅醫生們都非常不解病發原因，後來經過美國、加拿大、澳洲以及英國頂級兒科醫院專家研究多月，發現患者們都睇過一位自稱患有妥瑞症（Tourette Syndrome）嘅TikTok網紅影片，從而懷疑患者抽動症狀同影片有關。（妥瑞症係一種遺傳性神經系統疾病，主要症狀係不自主反覆抽動）

今年17歲嘅Kayla Johnsen曾患上抽動綜合症，目前已痊癒。（圖片截自：華爾街日報）

目前未知全美有幾多宗病例，之不過各地醫院都有報告類似患者激增，其中美國辛辛那提兒童醫院神經病學家Donald Gilbert就指出，從2020年3月以嚟每個月都會有10宗新病例，喺疫情之前每個月頂多只有一宗。但都有醫生認為唔可以將問題怪晒落TikTok或其他社交媒體，有部份青少年用社交媒體會患上抽動綜合症，同時都有青少年冇患病，病發原因可能涉及更多因素，例如焦慮、抑鬱以及壓力等等。