隨住手機市場不論規模定技術都進入飽和狀態，唔少人都認為智慧穿戴裝置會係未來嘅科技重點。Meta似乎就將目標選定於眼鏡之上，除咗早年與Ray-Ban合作推出「Meta Glasses」外，更係早於五年前就公佈會開發AR智慧眼鏡「Orion」。日前Meta就於年度發佈會上正式公佈Orion嘅特點與功能，又的確係幾令人心動？

Meta新聞稿指出，與之前嘅Meta Glasses相比，Orion係「於一個能夠舒適地佩帶一整日嘅體積大小中，真正結合大型全息投影顯示及個人化AI助手」嘅「真正AR眼鏡」。外型上Orion係非常粗嘅粗框眼鏡，但實際上只有98克重，當中當然有Meta努力為Orion減重（例如碳化矽取代玻璃鏡片）嘅原因，但更重要嘅或者係Meta將部份部件放咗必須要配合使用、大小有啲似個小型電視遙控嘅輔助裝置之中，進一步減輕眼鏡嘅重量。

但話雖如此，眼鏡本體中仍然塞咗全息影像要用嘅uLED微型投影機、 7個微型攝影機和感測器等設備，配合負責計算嘅輔助裝置就可以做到眼球追蹤、手部追蹤、SLAM（simultaneous localization and mapping，同時定位與地圖建置）等功能。操作方面就要配合附送嘅EMG腕帶，並可以做到單手「滑動」、指尖「點擊」等操作功能。而且由於係用手帶感應，所以用家隻手唔需要被鏡頭影到，換言之垂低手一樣可以操控。

配合Meta AI使用，Orion能夠理解用家眼前嘅事物，並透過全息顯示向用家提出建議。例如新聞稿中就示範咗用家望住一堆食材，Orion提供食譜嘅情景；另外亦提到「一邊洗碗、一邊同家人視像並調程家族行程」嘅例子，另外亦可以遊玩AR遊戲、使用Whatsapp或FB Messenger等。Meta仲話未來會有更多第三方App支援Orion。

但至於呢個「未來」幾時先會來，暫時都仲係個未知之數。因為雖然Orion睇落頗為吸引而且功能完整，但目前Meta無意將其推出市場，而係邀請內部員工及少量外部人士參與試用。新聞稿中亦指出Orion未來發展嘅三大方向：令AR顯示更為銳利及清楚、試圖進一步縮小體積及減輕重量、以及大量生產令成本降低。

資料來源：Meta