大家一定有試過打機時遇到超難打嘅Boss或者關卡，結果緊張到出哂手汗。不過未來呢個情況可能唔會經常發生——唔係未來嘅遊戲嘅冇咁難玩、亦唔係未來人類唔會出手汗，而係因為Sony新申請嘅專利顯示，佢哋正研究一種因應玩家手汗情況而改變遊戲難度嘅技術！

據外媒《TECH4GAMERS》報導，Sony日前發佈咗一個利用手掣分析玩家手汗嘅新專利技術，預計會於手掣上加入光譜學裝置，透過分析光照於手汗之上後散射出黎嘅不同狀態，從而得知手汗中嘅化合物成份，並得知玩家當時嘅身體狀態，繼而再對遊戲產生影響。例如假若發現玩家手汗中嘅葡萄糖及皮質醇偏低，就代表玩家正處於疲勞狀態，遊戲就可能會自動調低難度，又或提議玩家休息一陣以減輕壓力。

專利文件中亦提到，「調低遊戲難度」嘅方法包括加大敵人嘅受傷害判定範圍（即係玩家更容易打中敵人），又或為玩家配對較弱嘅對手等。目的在於降低玩家因遊戲太難、壓力太大而感到沮喪、憤怒嘅機會。

雖然類似嘅光譜學技術早已存在，但過往通常都需要額外儀器。Sony新專利嘅特別之處就係將其融入手掣之中，未來亦可能會於VR裝置上加入。

從Sony嘅角度，降低遊戲難度、確保玩家心情愉快固然能延長遊玩時間，亦可能對於玩家心理健康有好處。但對玩家而言，遊戲自動降低難度，就可能會失去挑戰自己嘅意義——試想像下你打《Elden Ring》單挑女武神，好不容易打贏然後發現原來係因為隻Game覺得你太緊張刻意放水，成件事就突然非常空虛。

資料來源：TECH4GAMERS