之前我哋報導過Google公佈「捕日者」計劃，希望能夠於太空建立AI數據中心衛星，直接吸收太陽能作能源，以減低於地球上運行嘅電力成本。而其實Elon Musk亦有類似嘅計劃，近日佢更加開始付諸行動：SpaceX 正式向美國聯邦通訊委員會（FCC）提出發射100萬粒衛星嘅申請。以目前地球軌道有約1.5粒衛星黎計，Elon Musk要射多六十幾倍上天，都真係幾誇張。

圖片：Wikicommons

隨住AI競爭越黎越激烈，一眾科技鉅企對於數據中心嘅需求越黎越高，而喺地面上建立數據中心唔單止要地，更需要解決供電、散熱，以至連帶嘅法規等一系列問題。對比之下，於太空中建立「數據中心衛星」既慳返地皮費用，亦可以利用太陽能解決供電問題，就如SpaceX嘅申請文件中指出，「直接利用近乎恆定嘅太陽能，幾乎冇運營同維護成本」。

而要建立太空數據中心，SpaceX嘅角色就至關重要。以佢哋目前嘅可重複利用火箭，若真係能做到常態發射，將能達到「每年將數百萬噸載荷送上軌道」嘅目標，大大減低發射衛星嘅成本。

圖片：Wikicommons

但要注意嘅係，SpaceX申請發射100萬粒衛星，唔代表未來真係會發射100萬粒。事實上衛星運營商為咗保留彈性，往往會入紙申請遠超其實際部署嘅衛星數量。例如SpaceX目前嘅Starlink計劃，當年就申請發射4.2萬粒衛星，但到目前為止都係發射咗9,500粒左右，即申請量嘅1/4左右。

但即使以呢個比例黎計，最終太空中都可能會有25萬個太空數據中心，仍然係目前衛星量嘅十幾倍。

資料來源：Reuters