唔少男人由細到大都鍾意吹噓自己嘅下體大小，但若然以「人類」整個物種去同黑猩猩、大猩猩等人科動物相比，其實所有人都有「大JJ」，而且唔係相對體型嘅大，係絕對大小嘅大。但問題係點解人類男性要有特別大嘅下體呢？近日一個澳洲研究就提供兩個原因：吸引異性以及阻嚇同性。

網上Meme圖「Gigachad」

圖片：Reddit

首先，人類嘅祖先開始兩足站立之時，係未有「著衫」、「遮擋重要部位」嘅概念，所以人類男性嘅下體係比其他人科動物更加顯然而見，亦導致其功用不限於「傳遞精子」之上。研究團隊認為當時人嘅下體同獅子嘅鬃毛或者鹿嘅角一樣，都係對自己戰鬥力嘅展示，以吸引異性交配及阻嚇同性競爭。其中過去已經有研究證實前者（即女性認為下體較大嘅男性更具吸引力），而澳洲團隊就係想搵到證明後者嘅證據。

為此，佢哋搵黎800名男女受訪者，並向佢哋展示超過300張由電腦生成、擁有不同高度、體型以及下體嘅男人裸體圖。女性受訪者要評價圖中人嘅性吸引力，而男性受訪者就要將圖中人視為潛在競爭對手，評定佢哋於體格威脅性或性競爭力。

研究所用嘅電腦生成男性裸體圖

圖片：journals.plos.org

結果發現，不論男女受訪者都認為「下體大」嘅男性更具性吸引力（對男人黎講就係更大競爭性）。雖然對女性受訪者而言，「下體大」嘅吸引力增長會遞減，換言之大到某個程度，吸引力升幅就會減少，但依然係再次證實前文提到嘅「吸引異性」功用。至於「阻嚇同性」方面，男性受訪者則視「下體大」嘅男性擁有更強嘅戰鬥力以及（對女性嘅）性吸引程度，而且無遞減，越大就覺得人哋越勁。

研究團隊指，今次結果顯示人類男性嘅下體之所以咁大，好可能係受「吸引異性」及「阻嚇同性」兩個因素共同影響而得出嘅「進化策略」。但佢哋強調「吸異異性」對人類男性下體嘅影響力，要比「阻嚇同性」高4到7倍，換言之「吸引異性」先係主因，「阻嚇同性」似乎係附帶好處。研究嘅另一個有趣發現，係不論男女，都能夠於較短時間內判定「下體較小」、「身高較矮」及「身型無咁V」嘅男性嘅性吸引力或威脅程度較低，換言之即係潛意識就知道有呢啲特質嘅人唔吸引或不具威脅。 

資料來源：The Conversations、Experimental evidence that penis size, height, and body shape influence assessment of male sexual attractiveness and fighting ability in humans