咁究竟夏天有咩魔力令人投進情慾之海當中呢？答案或者比你想像中簡單，就係因為陽光。根據性愛與關係專家Tammy Nelson所說，夏天人們曬得多陽光，體內血清素就會增加，令人覺得更高興而且更有自信，於是更願意去做啲平時唔敢做嘅嘢——不論係開始新戀情、離開舊戀情，又或者出軌——而且更少覺得後悔或內疚。

美國臨床性學者Paul Nelson則提出一個更「顯眼」嘅原因——熱，所以大家著少咗衫；著少咗衫，所以引起大家嘅「性趣」——確實係非常赤裸嘅現實。另外大部份大型戶外活動(如音樂節)亦於夏天舉行，於是大家有更多機會認識新朋友，出得黎玩，唔爭在去埋巫山啦！

睇到呢到，你係咪會心諗：「死啦！夏天都就黎完，我仲同左手玩緊遊戲添！」放心，因為冬天(12月尾到1月)亦係另一個「交投高峰」。同夏天追求刺激，或多或少有啲隨性衝動唔同，冬天比較容易開展認真嘅關係，原因亦好簡單，因為凍。另一位性學者Lawrence Seigel指或者係因為哺乳類動物天生嘅「取暖習性」，天氣一凍人們就會希望能互相取暖渡過冬天，所以單身人士就會希望搵返個伴——當然，年尾嘅節日氣氛又係助長感情嘅一大要素啦。而且凍咪唔出街，唔出街有咩好做呀？做愛囉！所以你知點解特別多朋友9月生日呢？